Ich jans von Storchenberch vnd alle mein Eriben vergehen offenbar an disem prief vnd tuen chunt allen den, die in sehent, lesent oder ho^erent lesen, Daz wir gesazt haben vnsern Marcht datz dem Nevnmarcht besuecht vnd vnbesuecht mit alle dev, vnd dartzue gehort, hern Gundakern von Storchenberch vnserm Vetern vnd seiner Haw^esvrawen vron Alhaiten vnd ier paider Eriben, die di miteinander habent oder noch gewinnent, vmb fu^enftzig phunt alter Wienner phening also beschaidenleich, daz wier den vorgenanten Marcht lo^esen schullen alle iar ja^erchleich vor vnser Vrawen tag ze der Liechtmess achtag oder hinnach in achtagen vnd sein auch wier dez vorgenanten satze ier gewer, swo in dez du^erft geschiecht, also Landes recht ist. vnd darvber tzv^e einem vrchvnde vnd tzv^e einer sta^etichait gib ich vorgenanter jans fu^er mich vnd fu^er mein Eriben meinem Vetern hern Gundakern vnd seinen Eriben disen offenn prief versigelt mit meinem insigel vnd ist daz geschehen, dv von Christes purt ergangen worn Drevzehen hundert iar, darnach in dem fierzkistem iar dez Svntages nach sand Peters tag ze Storchenberch in dem Haw^es.

Source Fulltext: OÖUB 6 (Wien 1972), S. 337f., Nr. 332