Ich Dietreich der geltinger, mein Hawsfraw vnd all vnnser Eriben vnd nachkomen verjechen vnd tu^en kund vnuerschaidenlich offenlich mit dem brief allen den, die in ansechnt oder ho^erennt lessen, das wir mit wolbedachtem muett vnd zw der zeitt, da wir es wolgetu^en mochten, vnbetwungenlich ich noch all mein Erben vnnd Nachkomen noch ander yemant von vnsern wegen wider vnnser gnadig lieb Herren Graf Hainreichen, Graf Wernnhartten, Graf Ruedolffen vnd graf fridreichen gepru^eder vnd grauen zw Schawnnberg vnd all ir Erben vnd nachkomen vnnser gesaˆss datz Haiting wider sew nymermer gepawn sullen mit kainerlay sachen, wie di genant oder gehaissen werden, Wo wir des v^ebergriffen oder v^eberfu^eren, das wider vnnser gnadig Herrn vnd ir Erben vnd nachkomen (— etwas ausgefallen —) hant mit vnserm leib vnd gutt vnd mu^egen damit tu^en vnd lassenn an allew gnad, wie oder was sew verlust an allerstatt vnd an alles rechtt nichts ausgenomen Also, das vnns kain Herren, Es sey kaiser, kunig, geistlicher Herr vnd furste vnd stett oder wie dj Herren all genannt mugen sein, wider vnnser gnadig herrn noch ir Erben vnd nachkomen grauen zw Schawnberg vnd wider sew nicht behaltten an alles geua^er, an alle arglist; wo vns da vnser gnadig Herren Eraisthennt oder Erfindent, da sol man vnns aus der selben herrn piett, es sey aus Vestenn oder aus stetten oder wie das alles genant mag sein, mit vnser leib vnd gutt in ir hanndt antwurtten an alle widerred vnd schullen auch dan kainer herren gnad vnd huld in kainer weis nicht verliessen, wie so die genant mu^egen sein, vnd furwasser gen jn an allen arglist vnentgolten beleiben. Vnd des zw ainem warn vrkund geben wir den brief vnsern gnadigen Herrn versiglt mit meinem anhangunden Insigl, vnd ze ainer pessern sicheraitt der sach mit der Erbern lieben Herrn seifritz des Hugenperiger, herrn Jacobs des Strachner, Marichartz des Grueber, Gottharten von Tanberig vnd Albrechten des Grausmerkcher (sic! Greusnekher?) aller anhangunden Insigl, dj wir mit vleis darvmb gepetten haben, Der sach sind zewg mit jrem anhangunden Insigl in vnd jren Erben anschaden. Der brief ist geben, do man zallt von kristi gepu^erdtt drewzechenhundertt vnd darnach in dem virtzigistenn Jar an sand Thomans tag des heiligen zwelifpotten.

Source Fulltext: OÖUB 6 (Wien 1972), S. 363f., Nr. 359