Ich Offmey von Lobenstein, Hern Peters witib von Lobenstain, dem Got genad, Vergich vnd tvn chunt offenbar an disem brief allen den, di in sehent oder hörnt lesen, Daz ich mich bericht han mit meinem Sun Petern von Lobenstain vnd mit seinem Erben vnd gein meinem chinden, di ich by meinem wirt han Hern Petern von Lobenstain, dem got genad, Also, daz er mir gesaczt hat Di weingarten ze Arnstorf vnd an dem Seczperig vnd di gu^et vmb di Freynstat, Ez sey in vrbar oder verlehencz, vnd daz virtail in dem Dorf ze Ottenslag. Di gu^et versu^echt vnd vnuersu^echt, als vor verschriben stet di sint mein sacz fu^er vier Hundert pfunt phenning alter wienner mu^ens in allem dem Rechtem, vnd Morgengab recht ist, Nach dez Lancz recht ze Osterreich An alz vil, wand mein sun Peter von Lobenstain oder sein Erben Lo^esen wil, so sol ich im, oder wer daz gu^et inn hat, im ze Lo^esen geben, im oder sein Erben zwischen fasnacht vnd sand Jo^ergentag aller Jaerchleich vnd waz ich Leich mit der Hant dez selben gu^etz, daz schol nach meinem tot hin wider Erben auf den vorgenanten Petern von Lobenstain vnd auf sein Erben an allen chrieg, vnd waz ich prief fv^erbaz zaig von meinem wirt Hern Petern von Lobenstain, dem got genad, oder von dhainem Porgen oder von im Petern meinem sun, Die schu^ellen im dem vorgenanten Petern von Lobenstain vnd sein Erben dhain schod sein an den brief, den ich vber den vorgenanten sacz han, Daz im daz also sta^et beleib, gib ich im disen brief versigelten mit meinem anhangenten Jnsigel vnd mit hern Eberhartz von Walse Jnsigel, Der ze den zeiten Haupman waz ob der Ens, vnd mit meins Pruder Jnsigel hern Gundakchers von Storchenberch vnd mit Hern Jansen Jnsigel von Reichenstain. Daz ist geschehen, da man zalt von Christes gepu^ert Tausent Jar, Dreu Hundert Jar, Darnach in dem virczkistem Jar, an sand Katreintag.

Source Fulltext: OÖUB 6 (Wien 1972), S. 357, Nr. 352