Wier Haymbreich von Gotes gnaden Abt ze Melch Veriehen vnd tuen chunt offenleichen mit disem brief vmb den zehenten ze Ru^etzestorf vnd swas darzv^e gehoret chlainen vnd grozzen ze velde vnd ze dorffe, swie so das genant ist, die vnser lieben Ohaimen her Vlreich von Pergawe ze den zeiten Hertzog Albrechts Hofmaister jn Osterrich Vnd Perchtolde von Pergawe payde Pruder von vns ze lehen habent, Das der vorgenant Perchtolde von Pergawe seinen halben taile des selben zehenten ze Ru^etzestorf mit vnserm gueten willen gesaczt hat Dem vorgenanten Hern Vlreich von Pergawe seinem Pru^eder, als er brief von jm dar vber hat. Da hat der vorgenant her Vlreich von Pergawe seiner Hausfrowen vron Offmeyn auf gezaiget, als die prief sagent, die si von jn Payden dar vber hat. Vnd das disev wandelvnge geschehen sei mit vnserm gueten willen, Des geben wir jn disen brief ze vrchunde diser sache versigilten mit vnserm Anhangvnden jnsigil. Diser brief ist geben ze wienne nach christes gepu^ert Dreutzehen Hvndert jar, Darnach in dem ayn vnd viertzigistem jar, des andern Svntages in der gantzen Vastwochen, als man singet Reminiscere.

Source Fulltext: OÖUB 6 (Wien 1972), S. 370f., Nr. 366