Ich Hainrich der alt von Waltse genant von Dachsp(erch ver-) gich vnd tuen chunt allen Leuten, die den brief sehent vnd horent lesen, Daz Ich vnd mein Erben vberain sein chemen Mit allen meinen Vetern von Waltse, wie di genant sind, vmb alle die ansprach, Die Ich vnd mein Erben gen jn vnd gen jr Leut vnd jr guet zesprechen heten, Daz si gehabt haben in dem Land ze Sbaben, Ez sei ze Waltse oder ander ir veste Vnd waz dar zv gehoret, Oder an jr Leut Oder an jr guet, wie so daz genant ist, Ez sei Lehen oder aigen, Gentzlich vnd gar vns vericht habent Also, Daz Ich vnd mein Erben nimmermer chain ansprach sol da gegen Haben. Des zv ainer stêt Gib jch vor genanter Hainrich von Waltse genant von Dachsperg den brief versigelten mit meinem Insigel Vnd mit Hern Eberhartes Insigel des Druchsetze von Waltpurch Vnd mit Hern Fridreiches Insigel genant der Schrautolf, Di der sache gezeuch sind mit ir insigel. Der Brief ist geben ze Lintz nach Christes geburd Dreutzehen Hundert iar Vnd in dem ainz Vnd Virczigisten iar Des nachsten Mantag nach der aindlef Towsent Megt tag Der Heiligen iunchfrown.

Source Fulltext: OÖUB 6 (Wien 1972), S. 395f., Nr. 391