Ich Otte der Hoeusler von Wildenstain Vergich vnd tu^en chvnt allen den, die disen brief lesent oder ho^erent lesen, die nv lebent vnd hernach chvnftich sint, Daz ich mit meiner erben gu^eten willen vnd gunst mit verdachtem m\et zv^e der zeit, do ich iz wol getu^en mochte, vnd mit meins Lehen Herren hant des Hochwirdigen fu^ersten Pischolf Go^etfrides von Pazzawe Recht vnd redleich verchauf vnd geben han meins rechten Lehens, daz ich von im ze Lehen gehabt han, allen meinen Zehent, den ich gehabt han auf Otten Hof des ammans von Stoetzendorf, der da leit da selbens ze Stoetzendorf mit alle dem nvtz vnd recht, als ich denselben zehent in Lehens gewer her pracht han vmb acht phvnt wienner phenninge, der ich gar vnd gentzleich gewert bin, Dem erbern Herren hern Stephan von Hohenbereh vnd seiner hausvrowen vron alhaiten vnd im erben, Fv^erbaz ledichleichen vnd vreileichen ze haben vnd allen irn frumen da mit ze schaffen, verchauffen, versetzen vnd geben, swem si wellen an allen irresal, vnd bin auch ich vnd mein erben des vorgenanten zehentes ir recht gewern vnd scherm für alle ansprach, als Lehens recht ist vnd des Landes recht ze O^esterreich. Woer aber, daz si mit recht an demselben zehent icht Chrieges oder ansprach gewunnen, swaz si dez schaden nement, daz sol ich in alles aus richten vnd wider chern an alle ir mv^e vnd an allen irn schaden vnd svln auch si daz haben auf mir vnd auf allem meinem gu^et, daz ich han in dem Lande ze O^esterreich, ich sei lebentich oder tode. Vnd gib in dar v^eber disen brief zv einem warn vrchu^ende diser sache versigilt mit meinem jnsigil vnd mit meiner Pru^eder jnsigiln hern fridreichs vnd hern Marichartes der hêusler, die diser sache gezeuge sint mit irn jnsigiln. Diser brief ist geben ze wienne nach Christes gepurt drevtzehen Hvndert iar, dar nach in dem zway vnd viertzgisten iar des naehsten Moentages nach vnser vrowen Tage der Schidunge.

Source Fulltext: OÖUB 6 (Wien 1972), S. 423, Nr. 418