Ich Alhait Jansen Hausvrow des Redler vergich offenleichen an disem brif vnd tun chunt allen den, die in horent, sehent oder lesent, daz ich mit wolbedachtem mu°t, mit gunst vnd mit willen meiner Tochter Alhaiten vnd aller ir Eriben nach weisung vnd rat meiner pesten vreunt reht vnd redleiehen ze chauffen geben han den Edeln meinen liben genedigen herren hern Reinprechten vnd hern Fridereichen Brudern von walse vnd iren payden Eriben den Hof ze Dristnich mit sambt den zwain Lehen, die dar in gehorent, vnd mit allev dev, vnd darzv gehornt ze holez, ze veld, gepawn vnd vngepawen, ez sein Echer oder Wismad, als ichs vnd mein erer wirt, dem got gnad, Jans von Dristnich in vnser nucz vnd gewêr gehabt haben, versucht vnd vnuersu^echt, vmb Hundert phunt vnd vmb funf vnd Sechtzk phunt alter wienner phenning, der ich vorgenantev Alhait vnd mein Tochter Alhait, di ich mit meim erern wiert mit Jansen von Dristnich gehabt han, gantz vnd gar verricht vnd gewert sein vnd sol ich noch mein vorgenantev Tochter noch vnser Eriben noch allev di, di ze dem vorgenanten hof Erib sein wolten, furbaz chain ansprach noch zv^euersicht darzv niht haben. Wir sullen ouch desselben hofs vnd chauffs ir gewer sein fur all ansprach ze hof, ze tayding an aller der stat, da in vnd iren Eriben des not geschieht oder ist, als des Lantz reht ist in Osterreich. Tet aber ich des niht, waz si des schaden nemen, daz si oder ir Eriben pey iren trewn mochten gesagen, daz sullen wier in abtun vnd auzrichten, vnd waz in daran ab gieng, daz sullen si haben auf mir vnd auf aller meiner hab, wo ich di han, versucht vnd vnuersucht vnd mich dar auf notten vnd phenden als lang, vntzt si irs Schadens zv choment. vnd daz in vnd iren Eriben der chauf von mir also stet vnd vnuerchert beleib, Darvber zv eim vrchund gib ich in disen brif gesigelten mit meins wirtz Insigel Jansen des Redler vnd mit meins Ohaims Insigel mit hern Nyclas an dem Espan, nach des rat der chauf gewandelt ist. Daz ist geschehen nah Christes gepurd vber Dreuzehenhundert Jar. dar nah in dem zway vnd viertzkistem Jar an sand Elspeten tag.

Source Fulltext: OÖUB 6 (Wien 1972), S. 426f., Nr. 421