Ich fridreich der fleischesse vergich vnd tvn chunt allen den, die disen brief lesent oder ho^erent lesen, Daz ich mit meiner erben guten willen vnd gunst, mit verdachtem mv^et zv^e der zeit, do ich es wol getun mochte, vnd mit meins Lehen Herren hant des Hochwirdigen fu^ersten Pischolf Go^etfrits von Pazzawˆe Recht vnd redleich verchauft vnd geben han meins rechten Lehens, daz ich von im ze Lehen han gehabt, mein Lehenschaft des viertail dorf zehents ze Ru^etzestorf grozzer vnd Chlainer, ze velde vnd ze dorf, swie so der genant ist, mit alle dem nvtz vnd recht, als ich die selben Lehenschaft in Lehens gewer her pracht han, vmb sechs phunt wienner phenninge, der ich gar vnd gaentzleich gewert bin, Dem erbern Herren hern Stephan von Hohenberch vnd seinen erben fu^erbaz ledichleichen vnd vreileichen ze hahen vnd allen irn frumen da mit ze schaffen, verchauffen, versetzen vnd geben, swem si wellen an allen irresal, vnd bin auch ich vnd mein erben vnuerschaidenleich der Lehenschaft des vorgenanten viertail zehents ir recht gewern vnd scherm fv^er alle ansprach, als Lehens recht ist vnd des Landes recht ze O^esterreich. Waer aber, daz si mit recht an der selben Lehenschaft icht Chrieges oder ansprach gewunnen, swaz si des Schaden nement, daz sol ich in alles aus richten vnd wider chern an alle ir mvˆe vnd an allen irn schaden vnd suln auch si daz haben auf mir vnd auf allem meinem gu^et, daz ich han in dem Lande ze O^esterreich oder swo ich es han, ich sei lebentich oder tode, vnd gibe in dar v^eber disen brief zu^e einem warn vrchu^ende diser sache versigilt mit meinem jnsigel vnd mit des erbern Herren jnsigil hern Chadolts von altenburch, der diser sache gezeuge ist mit seinem jnsigil. Diser brief ist geben ze wienne nach Christes gepurt drevtzehen Hvndert iar, dar nach in dem drev vnd viertzgisten iar des Phintztages in der andern wochen nach dem Pericht Tage.

Source Fulltext: OÖUB 6 (Wien 1972), S. 434f., Nr. 430