Ich prueder Wernhart in unser vrowen chloster weizzes ordens dacz dem Slegel vergich und tuen chunt offenbar an disem prief allen den, di in sechent, lesent oder horent lesen, di nu lebent oder hernach chumftig werdent, daz ich mit guetem willem mit verdachtem muet und mit verayntem rat und gunst meines herren hern Nyclas probsts zu der selben zeit und dez gemaynem convencz dez egenanten chlosters und auch meines prueders Ulreichs von Woytgendorf und aller meiner vreunt zu der zeit, do ich iz wol getuen mocht, recht und redleich verchauft han mein dorf ze Worsikslag, dez fumf lechen und ayn vierteil ist, daz mein.rechtes eribtail gewesen von meinem vater Ulreichen Pern von Woytgendorf, dem got genad, mit alle dem nucz und recht, als er iz inn gehabet hat, umb vier und czwaintzik phunt Pazzawer phenning, der ich gar und gentzleich verricht und gewert pin, dem erbern herren apt Thomann zden selben zeiten und dem erbern convent ze Hohenfurt also beschaydenleichen, wan daz ist, daz di erber vrow Offmei mein steuf mueter, Symons dez Nimmervols mueter gestirbet, daz si iz dann aften des haben schullen ledichleich und vreileich ze wald und ze veld versucht und unversucht mit alle dem, daz dar zue gehoert, ze verchauffen und versetzen und allen iren frume da mit ze schaffen, als iz in aler pest chom und vuge an allen irsal und an alleu ansprach elwichleich. Daz di redd all stet und gantz und unczeprochen beleib an allen chrieg ewichleich, darum gib ich in disen prief versigelten mit meines herren hern Nyclas dez probsts insigel und auch mit dez convencz insigel und mit meines herren hern Peters von Rosenberch insigel und mit meins prueder Ulreichs von Woytgendorf insigel. Und ich Peter von Rosenberch vergich bestetig mit meinem anhangunden insigel, daz der chauf mit meinem rat, mit meiner hilf und mit meiner gunst geschechen ist. Diser prief ist gegeben do von Christez gepuerd ergangen warden treuczehenhundert jar darnach in dem dreuuntvierkistem jar an sand Nyclas tag.

Source Fulltext: OÖUB 6 (Wien 1972), S. 457f., Nr. 453