Ich Palwein der Hoechel vnd mit sampt mir all mein Erben wir vergehen vnd tu^en chunt allen den, di disen prief sechent horent oder lesent, Daz wir mit wolverdachtem mu^et vnd mit vnserm gutlichen willen vnd auch rat vnser pesten Vreunt haben ze chawffen geben dem Erbern mann hern Perichtolden Schefolten ze der selben zeit Statrichter ze Ens vnd allen seinen Erben drev Phunt wienner Phennig Purchrecht geltes Ebichlichen auf vnsern zwain Ekchern, der ain der gelegen ist hinter vnser Vrown Chirichen, der ander zwischen der Pharr vnd vnsern Vrown Chirichen niderhalben dez wegs vnd in der Phaltz genant, also, daz wir im vnd seinen Erben oder wem si daz schaffent, êbichlich geben schullen drev Phunt wienner phening Purchrecht geltes jn dem jar ze zwain Taegen; zwelif schilling an sand Gorgen Tag, der schirist chumt, vnd zwelif schilling geltes an dem Prechentag, der dar nach schirist chumt. Tu^en wier dez nicht vnd dem vorgenanten Perichtolten Schefolten vnd seinen Erben oder wem si den ebenanten gelt schaffent, nicht engeben zu iˆe dem Tag als vor geschriben stet, so hat sich alles das recht veruallen gen vns vnd gen den êbenanten Ekchern, daz ander Purchrecht recht hat hie ze Ens in der Stat, daz di Herczogen in O^esterreich an gehört vnd der sach schullen all Lêut ier gezeug sein. Daz di red also von vns stet vnd vnzebrochen beleib, dar vmb so geben wier dem egenanten Perichtolten Schefolten vnd allen seinen Erben disen Prief ze einem sichtigen warn gezeug der egenanten Sach bewert vnd bevestent mit der Stat ze Ens anhangundes (sic) jnsigel. Daz ist geschehen nach vnsers herren gepu^erd vˆber dreuczehen hundert jar, dar nach in dem dreuvndvirczkistem jar an sand Thomas Tag.

Source Fulltext: OÖUB 6 (Wien 1972), S. 459f., Nr. 455