Wir Albrecht von gotes gnaden Herczog ze O^esterreich, ze Steyr vnd ze Kernden Tu^en chunt mit disem brief, Daz fu^er vns chome vnser getriwer Purchart der Chneuzzer vnd hat mit vnserr hant, gunst vnd guetem willen Hansen dem Chneuzzer seinem Vettern recht vnd redlichen gemacht daz gu^et ze Pyberbach vnd waz im sein wiertinn Hainreichs to^echter von Awe gemacht hat, daz lehen von vns ist vnd swaz er gechouft hat, daz ouch lehen von vns ist, Vnd ouch alle di phant, di er von vns hat oder von wem er die hat, vnd darczu^e allez sein varent gu^et, wi daz gnant sei, Also beschaydenlich, Ist, daz der vo^ergenant Pu^erchart Chneuzzer an erben abget, so sullen di vorgeschriben gueter allev, ez sein lehen, phand oder varent gu^et geuallen an den egenanten Hansen den Chneuzzer in aller der weis, als die Pu^erchart der Chneuzzer sein vetter ieczund innhat . . Wer aber, daz derselb Pu^erchart Chneuzzer erben liezze, ez weren su°ne oder to^echter, an die sullen di vo^ergenanten gueter geuallen an alle widered vnd sullen si die dann inne haben vnd niezzen, als die derselb Purchart ietzund innehat vnd neuzzet. Wer ouch, daz demselben Purcharten dem Chneuzzer des no^et beschech, daz er di obgenanten gueter verchouffen oder versetzen mu^est, da sol im der vo^ergenant Hans Chneuzzer chain ierrung an tu^en. Des geben wier zu v^erchund disen brief besigelten mit vnserm jnsigel. Geben ze Wienn an Mentag vor dem Sunnevent tag Nach Christes gebu^erd Dreutzehen Hundert jar, darnach im vier vnd vierkisten jar.

Source Fulltext: OÖUB 6 (Wien 1972), S. 483, Nr. 479