Ich Chunrat von Ladendorf vnd ich Hedweich sein hausurawe wir vergehen mit disem prief allen leuten, Daz wir vnd vnser erben vnuerschaidenlichen gelten schuln Dem erbern herren hern Jansen von Topel vnd seiner hausurawn frawn Chlaren vnser swester vnd ir Paiden erben Fu^emftzig pfunt wienner pfenning, der wir seu wem schuln an sande Georien tag, der schierist chu^empt, vnd haben in da fur ze pfant gesatzt fu^emf pfunt geltes, ligent ze Ebertstorf pei obern Ru°stbach ouf behaustem gu^et ze dorffe vnd ze velde, deu auch vnser satz sint von dem erbern herren hern weicharten von winchel, der man alle jar dreu pfunt dient an sande Michelstag vnd zwai pfunt an sande Georien tag, vnd auch mit allem dem rehten vnd nutz vnd mit alle deu vnd da zv gehort versuht vnd vnuersuht, wie so daz genant ist vnd vreylich ze haben zv^e ainem rehten satz, nu°tzen vnd niezzen mit verchauffen, mit versetzen vnd ir gu^etes da von bechomen, als ez in aller peste fu^eget, als satzes reht ist in O^esterreich, wir schuln auch ich Chunrat von Ladendorf vnd ich Hedweich sein hausurawe vnd vnser erben in den vorgenanten satz scherm fur alle ansprach, als satzes vnd Landes reht ist in O^esterreich, nemen auer si des mit reht chainen schaden, den schuln wir in gar abtu°n vnd schuln si daz haben auf vnsern trewen vnd auf allem dem gu^et, daz wir haben in O^eesterreich; wir vergehen auch, daz wir nach vnser erben zv° chainer andern zeit in dem jar den egenanten satz losen schuln danne an sande Georien tag vnd wanne wir in oder irn erben an sande Georien tag ir pfenning geben, so ist vnser satz von in ledig, vnd alle di weil, vnd wir des niht tun, so schuln si des satz haben, als vor gesriben stet, vnd Dar vber geben wir in disen prief zv ainem gezeug diser sache versigelten mit vnserm jnsigel vnd auch versigelt mit hern Chunrats insigel des Tyrnstainer, den wir seines jnsigels zv^e ainem gezeug dar vber gepeten haben. Der ist geben ze wienne nach Christes Pu^ert dreutzehen Hundert jar vnd in dem fu^emf vnd viertzigistem iar an sande Nyclas tag.

Source Fulltext: OÖUB 6 (Wien 1972), S. 532f., Nr. 527