Ich Hans von Chappelln vergich offenbar mit disem Brief allen den, die in sehent, lesent oder hörent lesen, die nu lebent oder hernach chumftig werdent, Daz ich mich mit dem Erwirdigem Fursten meinem genädigen Herren Byschof Gotfriden von Pazzow gentzlieh verricht han Vmb den Chrieg, den wir miteinander gehabt haben Vmb die Vischwaid in der Trawn bey Ebelzperch Also beschaidenlich, daz mein Vischer von der Tvenaw vntz an die Traunprukk datz Ebelzperch Vischen sullen mit Rinnundem Zeug vnd mit Chlainem Zeug, Pern vnd Tawpelln. Si sullen aber dhain Vach slahen noch Reuschen legen. Dann oberthalb der Prukk sullen si vischen nur mit Chlainem Zeug, Pern vnd Tawpelln, vnd nicht mit Rinnundem zeug. Si sullen auch daselbs dhain Vach slahen nach Reuschen legen. Si sullen auch mit dem vorgenantem chlainen Zeug, Pern vnd Tawpelln oberthalb des Prukk nicht verer Vischen, denn als verr mein Dorf ze München get ynd daz yezund darzu gehört. Ich lob auch für mich vnd mein Sün vnd all vnser Erben dem vorgenanten meinem genedigen Herren Byschof Gotfriden vnd allen seinen Nachchumen Byschouen ze Pazzow, Daz wir seu an der vorgenanten Vischwaid oberhalb der Prukk vnd niderhalben nicht engen noch irren, noch dhainen Chrieg tun sullen ze Vischen wie si wellent, mit Vächer slahen, Reuschen legen, Rinnundem zeug vnd mit Chlainem vnd grozzem zeug, wie si wellent. Daz lob ich stet ze behalten mit meinen trewen. Vnd dar vber ze vrchund vnd warn getzeug vnd Ewiger bestetigung gib ich disen Brief versigelten mit meinem anhangundem Insigl. Der geben ist ze Wienn am Ertag vor sant Merteins tag. Do von Christes gepurd warn ergangen Dreutzehen Hundert Jar, in dem Funf vnd Viertzigistem Jar.

Source Fulltext: OÖUB 6 (Wien 1972), S. 529f., Nr. 524