Ich Johans von Chu^enring ze Seueld vnd ich Ann sein Hausurow veriehen mit disem Prief vnd tun chunt allen den, die in sehent oder ho^erent lesen, di nu lebent oder noch her nach chu^enftich werdent, Daz wier mit wolbedachtem muet vnd mit gu^etleichem willen vnd owch nach Rat vnserr pesten vriwnt habn wier vns genczleich mit v^ensern triwn verpunden vnd gelu^ebt vnd loben owch dem Erbern Herren hern Fridreichen von Walsse von Ens meim Sweher, vorgenanten Annen Vater vnd allen seinen Eriben, di er hat oder noch gewinnet, Daz wier vns genczleich vnd gar vnd an all widerred su^ellen fu^ertzicht tu^en vnd wellen owch recht vnd redlich verczeichen allez dez Gu^etes vnd Eribes, so der vorgenant v^enser lieber Herr her fridreich von Walsse vnd sein Erben habnt oder noch gewinnent, ez seinen (sic) Vestt, Saetz, Erib oder varund gu^et oder swie so daz genant ist, vnd su^ellen wier vnd wellen iem vnd seinen Erben daz volfueren vnd auch staeten mit v^ensern Priefen, dez sew wol genu^eegt, swenn daz ist, daz wier vns mit einander ze Haws seczen, es sei ze Sêueld oder anderswo, da wier mit einander mit Haws wonen vnd siezen; swenn dann er oder sein Erben darnach in ainem Moned oder hin nach zu vns cho^ement oder sendent, so sullen wier vnd wellen vns gancz vnd gar vnd an all widderred fu^erczicht tu^en vnd verczeichen, als wier vns dez vor an disem Prief mit v^ensern triwn verpunden vnd gelobt haben also, daz wier noch v^enser Eriben hincz iem vnd seinen Eriben, di er hat oder noch gewinnet, hincz ier Erib vnd gu^et, swie daz genant ist, daz si habent oder noch gewinnent fu^erbaz nimmermer dehain vordrung noch ansprach ewichlich haben su^ellen noch wellen weder vil noch wenich. vnd dar zu durich pezzer sicherhait, so seczen wir in zesampt vns ze Pu^ergel vnuerschaidenlich di Erbern Herren vnser liebn Vetern hern Johansen vnd hern Lewtolden von Chu^enring, vnsern lieben O^ehaim hern Eberharten von Walsse Hawbtman ob der Ens, vnser lieben vriwnt hern Stephann vnd hern Heinreich gebru^eder von Moeissow vnd v^ensern besundern vriwnt hern Reinbrechten von Scho^ennberch also mit auz. genommer red, ob wier in di gelu^ebd nicht staet haben noch volfu^eeren, swenn si dar vmb zu vns cho^ement oder sendent, als vor an disem Prief verschriben ist, swenn dann der vorgenannt her fridreich von Walsse oder sein Eriben vns vorgeschriben Pu^ergel monent vnd vordernt, so su^ellen wier in vnuerschaidenlich mit vnser selber leib Laysten hincz Wienn in der stat in ain Erber Gasthows, da sew vns hin zaigent vnd sullen da inn ligen vnd laysten, als Laystens vnd innligens Recht ist vnd nimmer auz cho^emen, vntz in allez daz richtichleich volfu^eert wiert vnd staet behalten wiert an allen iern schaden als vor an disem Prief verlv^ebt vnd verschriben ist. Waer aber, daz der vorgenant mein Sweher her fridreich von Walsse mein vorgenanten Annen Vater vnd sein Su^en, di er hat oder noch gewinnet, an Eriben ab giengen vnd verfu^eeren, des Got nicht verheng, swaz sew dann Eribes vnd Guetes hinder in lazzent, swie daz genant ist, daz sol dann Eriben vnd geuallen auf mich vorgenant Annen sein Tochter vnd auf di andern sein To^echter, di dann sint vnd auf di nachsten Erben, da ez dann ze recht auf Erben vnd geuallen sol. Daz di sach vnd daz Gelu^ebd also staet vnd vnzebrochen beleib, dar v^eber gib ich vorgenannter Johans von Chu^enring dem vorgenantem hern Fridreich von Walsse meinem Sweher vnd seinen Erben disen offenn Prief ze einem v^erchv^end der warhait mit meinem anhangundem Insigel bestaetigt, dar v^ender ich vorgenant Ann sein Hausurowe mich verpint allez daz staet ze haben vnd volfu^eeren, als vor an disem Prief verschriben vnd gelobt ist, vnd mit der Erbern Herren vnserr vorgeschriben Pu^ergeln anhangunden Insigeln geuestent vnd bestaetigt. Der Prief ist geben, do man zalt von Christi gepu^eerd dreuzehen hundert Jar, dar nach in dem sechs vnd vierczkistem iar an v^enser vrown Tag zder Liechtmiss.

Source Fulltext: OÖUB 6 (Wien 1972), S. 536ff., Nr. 531