Ich Perichtolt von Pergawe Vergich vnd tvn chunt allen den, die disen brief lesent oder horent lesen, Die nu lebent vnd hernach chu^enftich sind, Daz ich mit gu^etem willen, mit verdachtem mv^et vnd nach erber Leutt Rat zv der zeit, do ich iz wol getu^en mocht, Recht vnd redleich mit rechter furtzicht vnd mit Loz Getailt han mit meinem vetern v^elreichen von Pergawe vnser Haus, daz da leit auf der Hochstrazze vnd in der Walichstrazze, vnd alles daz, daz dar zv geho^eret, swie so daz genant ist Also beschaidenleich, Daz mir vnd meinen Erben recht vnd redleich mit rechter fv^ertzicht vnd mit Loz an rechter Tailunge geuallen ist Der Tail gegen der Stu^echssen haus v^eber mit sampt dem Garten vnd dem Hof von der Gemawerten Chuchen Ekke Geleichs v^eber vntz an der Padstuben Mauer Ekke Also, daz wir da mit suln fv^erbaz ledichleichen vnd vreyleichen allen vnsern frvmen schaffen mit verchauffen vnd mit versetzen, alz vns daz aller pest wol chvm vnd fu^ege an allen irresal. Da engegen so ist dem vorgenanten meinem vetern Vlreichen von Pergawe vnd seinen erben auch mit rechter furtzicht vnd mit Loz an rechter Tailunge Ledichleichen geuallen der ander Tail dez egenanten Hauses mit sampt dem Marstal in der Walichstrazze gegen dem Puchsser v^eber Also, daz si da mit svln fv^erbaz Ledichleichen Vnd vreileichen allen im frvmen schaffen mit verchauffen vnd mit versetzen, alz in daz aller pest wol chvm vnd fu^ege an allen irresal Also beschaidenleich, daz mein veter vlreich von Pergawe vnd sein Erben mir vnd meinen Erben geben svln von irm Tail auf vnsern tail dez egenanten hauses Hvndert phunt wienner phenninge, Vnd auch also mit auz genomer rede: Die weil si oder swer irn tail dez vorgenanten hauses nach jn besitzet, vns nicht engeben hvndert phunt wiener phennig, So suln si vns fu^erbaz alle iar da von dienen Zehen phunt wienner pheninge ze rechtem Pvrchrecht ze Drin Zeiten im iar, Achtzich pheninge vnd Drev phunt an sand jo^erigen tage, Achtzich vnd Drev phunt an Sande Michels tage vnd Achtzich vnd Drev phunt ze Wiennahten mit allem dem nvtz vnd rechten, alz man ander Pvrchrecht in der Stat ze Wienne dient. Vnd swenne si oder swer den vorgenanten irn Tail dez Hauses nach jn besitzet, die e genanten Zehen phunt geltes ab chauffen, daz sv^eln Si tv^en, swelhes iares si mv^egen oder wellen, immer fvmf phunt geltes vmb fvmftzich phunt wienner phening, oder alle zehen phunt geltes mit einander vmb hundert phunt, viertzehen tag vor einem iegleichen dienst tag an dienst oder inner viertzehen tagen vor dem dienst tage vnd den naehsten dienst da mit an allen chriege. Vnd daz disev sach fv^erbaz also staet beleib, Dar vmb so gib ich jn disen brief ze einem warn vrchu^end versigilt mit meinem jnsigel vnd mit dez erbern Ritter jnsigel hern Weichartes bey den Minnern brudern vnd mit hern Dietreichs jnsigel dez Vrwoetschen, die diser sache Schidleutt gewesen sind vnd auch diser sach gezeug sind mit irn jnsigeln. Diser brief ist geben ze Wienne nach Christes gebu^erde Drevtzehen hundert iar, dar nach in dem Sechs vnd viertzgisten iar an sand Plaesen tage.

Source Fulltext: OÖUB 6 (Wien 1972), S. 540f., Nr. 534