Ich Hoertel Walchuns Sun von yschel, dem Got gnad, vnd mit mier all mein Erben veriehen mit disem Prief vnd tu^en chunt allen den, di in sehent, lesent oder hörnt lesen, di nu sint oder her nach chunftich werdent, daz wier mit wolbedachtem mu^et vnd mit gu^etlichem willen vnd nach Rat v^enserr pesten vriwnt ze der zeit, do wier ez wol getun mochten, Recht vnd redlich verchowfft haben vnsern Hof an dem Hof genant, gelegen in der Stat ze Gmunden vnd dar zu allez v^enser Gu^et, daz wier haben in der Viechtaw in Mu^enstrer Pharr gelegen vnd zway Gu^et auf der Swantt in Lochchircher Pharr gelegen, dez allez mit der Summ wiert siben Phunt phenning Geltes an achzikch phenning, daz allez v^enser Rechtes Lehen ist gewesen von v^ensern gnêdigen herren hern Reimprechten vnd hern Fridreichen gebru^edern von Walsse von Ens. Daz vorgeschriben gut allez mit alle deu, vnd dar zu^e geho^ert ze holcz, ze veld vnd ze dorff, ez sei gepawen oder vngepawen, gestifft oder vngestifft, versuecht oder vnuersuecht oder swie so daz genant ist, vnd owch mit allen den rechten vnd nu^etzen, als wier ez in Lehens gewer herpracht haben, daz haben wier Recht vnd redlich verchowfft vmb zway hundert Phunt phenning wienner Mu^enzz, der wier gancz vnd gar verrichtt vnd gewert sein, den vorgenanten v°nsern gnêdigen herren hern Reimprechten vnd hern fridreichen von Walsse von Ens vnd allen ieren Erben fu^erbaz lediclich vnd vreylich inn ze haben vnd allen iern frumen da mit ze schaffen, verchowffen, verseczen vnd geben, swem si wellen, als in daz aller pestt cho^em vnd fu^eeg an allen ierrsal. Wier sein owch dez vorgenanten Guetes allez ier rechter gewer vnd verantw^ertter an aller der Stat, wo in sein not vnd du^erft beschiecht, nach dez Landes recht ze O^esterrich. Wêr aber, daz si an dem vorgenanten Hof vnd vorgeschribenn Gu^etern vnd an alle, vnd dar zu^e gehort, mit recht icht Chrieg oder Ansprach gewnnen, swie sich daz fu^eegt, wigetanen schaden si dez nement, den ier ains pei seinen trewen gesagen mag, den selben schaden su°llen wier in gancz vnd gar widerchern vnd ablegen vnd su^ellen si daz haben auf mier vorgenanten Hêrtlein vnd auf meinen Erben vnd auf aller v°nserr hab, di wier haben in dem Land ze O^esterrich, oder swo wier die haben oder noch fu^erbaz gewinnenn, wier sein lebntich oder Tot. Daz die Red vnd der chouf also stêt vnd vnuercht (sic) beleib, da v°ber gib ich e genanter Haertel den e genanten meinen gnedigen herren hern Reimprechten vnd hern Fridreichen von Walsse von Ens vnd allen iern Erben disen Prief ze einem ewigen waren geczewg diser sach mit meinem anhangunden jnsigel beuesttent vnd bestaetigt vnd mit hern Albers dez Lautterbechen, hern Herwortes dez Mu^elwanger, Hainreichs dez Wuermtaler vnd Chunrats dez w^erms anhangunden Insigeln bestaetigt, di pei dem Chowff sint gewesen vnd sein Geczewgen sind mit iern Insigeln. Der Prief ist geben, do von Christes gepu^erd waren ergangen dreutzehen hundert Jar, dar nach in dem sechs vnd vierczkistem Jar dez nachsten Sunntags vor v^enser vrown Tag zder Schiedung.

Source Fulltext: OÖUB 6 (Wien 1972), S. 558f., Nr. 552