Ich Hadmar von Mezzenpach vnd ich Agnes sein hausurowe Wir veriehen vnd Tun chunt allen den, die disen brief lesent oder Ho^erent lesen, die nv Lebent vnd hernach Chu^enftich sind, Daz wir mit vnser erben gu^eten willen vnd gunst, mit verdachtem mu^et vnd mit gesampter hant zv^e der zeit, do wir es wol getu^en mochten, Verchaûft haben vnsers Rechten Aygens vnser halbes Dorffe ze Rorbach in Haymuelder Pharre vnd alles daz, daz zu^e dem selben vnserm halben Dorffe geho^eret in vrbar, ze Holtz, ze velde vnd ze dorffe, es sey gestifte oder vngestifte, versu^echte oder vnuersu^echt, swie so daz genant ist. Daz selbe vnser Halbes dorffe vnd swaz dar zu^e geho^eret, als vor verschriben ist, Haben wir Recht vnd redleich Verchauft vnd geben mit alle dem nutz vnd Recht, als wir vnd vnser vodern daz alles in Aygens gewer her pracht haben, Vmb zway vnd New^eentzich phunt wienner phenninge, der wir gar vnd ga^entzleich gewert sein, Dem Erbern Herren Hern Stephan von Ho^echenberch vnd seiner hausurowen vron Alhaiden vnd irn Erben fu^erbas Ledichleich vnd vreileich ze haben vnd allen irn frumen da mit ze Schaffen, verchauffen, versetzen vnd geben, swem si wellen an allen irresal. Vnd vmb die an sprach, die wir auf dem andern halben tayl des egenanten dorffes ze Rorbach vnd swaz dar zu^e geho^eret, gehabt haben, des haben wir vns auch ga^entzleich verzogen vnd fu^ertzicht getan, daz wir noch vnser erben dar auf nimmer mer chain ansprach noch Chain vodrung suln haben noch gewinnen weder vmb vil noch vmb wenige. Vnd dar v^eber zu^e einer pezzern Sicherhait So setzen wir vns jch vorgenanter Hadmar von Mezzenpach vnd ich Agnes sein Hausurowe mit sampt vnsern erben vnuerschaidenleich vber daz vorgenant halb Dorffe ze Rorbach vnd vber alles daz, daz dar zu^e geho^eret, als vor an disem brief geschriben Stet, Dem egenanten Hern Stephan von Hochenberch vnd seiner hausurowen vron Alhayden vnd jren erben zu^e Rechtem gewern vnd Scherm fu^er alle ansprach, als Aygens recht ist vnd des Landes recht ze O^esterreich. Wa^er aber, daz si mit Recht an dem selben Halben dorffe vnd an alle devˆ, vnd dar zu^e geho^eret, icht Chrieges oder Ansprach gewunnen, Swaz si des Schaden nement, daz sv^eln wir in alles aus Richten vnd wider Chern an alle ir mv^e vnd an allen irn schaden, Vnd sv^eln auch si daz haben auf vns vnd auf allem vnserm Gu^et, daz wir haben in dem Lande ze O^esterreich oder Swo wir es haben, wir sein Lebentich oder tode. Vnd daz diser Chaûf vnd disev sache fu^erbas also sta^et vnd vntzerbrochen beleibe, als vor verschriben ist, Dar v^eber so geben wir jn disen brief zv^e einem warn Sichtigem vrchv^ende vnd zu^e einer Ewigen vestnunge diser Sache versigilt mit vnserm jnsigil Vnd mit Hern Otten jnsigil von Wildekke Vnd mit hern fridreichs jnsigil des Hagenawer vnd mit Hern Götfrits jnsigil des Sebekchen, Die alle diser sache Taydinger gewesen Sind vnd auch getzeuge sint mit irn jnsigiln. Diser brief ist geben ze wienne Nach Christes gebu^erde drevtzehen Hundert jar, dar nach jn dem Sechs vnd Viertzigisten jar An Sant Veyts Abent.

Source Fulltext: OÖUB 6 (Wien 1972), S. 553f., Nr. 546