Ich Dietmar der Engelpolcztorfer vnd ich Soffey sein Swester di zoblarin vnd all vnser Erben wir verjehen vnd tuen chvnt allen den, di disen Brief ansehent oder horent lesen, di nv sint oder noch Chumftig werdent, daz wir daz gut, daz do haizzet dacz prantstat vnd ist gelegen vor dem praitenluzz in der Riedmarch, ver Chaufft haben mit allen den nvczen, vnd dazu gehort ze holcz vnd ze veld, versuecht vnd vnversuecht mit allen den rechten, vnd wir ez inn haben gehabt, dem Erbargen Herren hern Gundachern von Storchenwerch vnd allen seinen erben vnd sein auch dez selben Guetz ir herr vnd ir gewer an aller stat fuer all ansprach, wo in dez not geschiecht, alz Lantz reht ist, vnd waz in daran abget vnd si sein schaden nement, den schull wir in abtuen gancz vnd gar an allen Chrieg vnd schullen auch daz Haben auf vnsern trewn vnd auf aller vnser Hab, di wir haben in dem Land ze Osterrich ob der Ens vnd nyderhalb der Ens vnd wo wir seu haben. Daz in daz also staet vnd vnverChert weleib, so gib ich Dietmar der Engelpolcztorfer in diesen Brief versigelt mit meinem anhangundem jnsigel. Der Brief ist geben, do man zalt von Christ gepurt Drewzehen Hvndert jar vnd in dem Sechs vnd Viertzkistem jar dez Ertagz in den pfingstveyertagen ze Wylperch in dem Haus.

Source Fulltext: OÖUB 6 (Wien 1972), S. 552f., Nr. 545