Ich Syghart der Salhentobler vnd ich Margret sein haussvraw wir veriehen an disem prief vnd tu^en chunt allen den, di in sehent oder ho^ernt lesn, daz wir mit wolberdachtem muet vnd mit guetn willn vnd gunst aller vnser erbn vnsern hof in Greimhartstetter pharre auf dem perg versuecht vnd vnuersuecht mit allen nu^eczen, verchaufft habn. Vnd der vorgenant hof meiner vorgenanten hausvrawn vraun Margreten rehtev margengab ist gewesn fuer funfczik phunt phenning, vnd ich vorgenante Margret vber mein êgnante margengab ainen prief han von meinem herren hern Petern von Lobenstain, den ich meinem freunt Vlreichn dem Weidenholczer an geuer cze behalten han gebn vnd sein von im nicht bechomen mag. der selb prief schol furbaz tod vnd vnnucz sein mir vnd allen meinen erbn, wand mein vorgnantev margengab verchaufft han mit meinem guetleichm willen. Daz di red also staet bleib, darvber gib ich vorgnantev Margret disen prief versigeltn mit meins wiertes Sygharts des Salhntobler anhangunden jnsigel vnd mit meins liebn ochaims Meinharts des Mihelpekhen anhangunden insigel, der sein geczeug ist. Der prief ist gebn nach Christes gepuerd dreuczehn hundert iar, darnach in dem aecht vnd vierczkisten iar an sand Thomans tag.

Source Fulltext: OÖUB 7 (Wien 1876), S. 87, Nr. 88