Ich Gedraut die Vngenadin, Chunrat des Vngenaden witbe, dem Got genad, vnd ich Peter von Liebenberch vnd ich Hainreich der Gralant vnd ich Chu^encz der Gra^edniker vnd ich Dyemu^et di Gralantin vnd ich Offmey die Gra^ednikerin vnd ich Anna die Liebenbergerin und alle vnser erben wier vergehen offenleich mit disem prief vnd tu^en chunt allen den, die in sehent, ho^erent oder lesent, daz wier vns vreuntleichen vnd liebleichen bericht haben gar vnd gênczleich mit vnserm lieben vreunt Wulfing dem Vngenaden, mit seiner hausfrawen vnd mit allen ieren erben vm alle die ansprach, die wier hincz in gehabt haben, vnd vm die halben vest ze Waltenstain vnd vm allez daz gu^et, daz Chunrat der Vngenad gelazzen hat, daz czu^e der egenanten vest geho^ert vnd daz lehen ist, von wem daz lehen ist, oder wa ez gelegen ist, mit allen den rechten vnd nuczen, die darzu^e geho^erent, ez sey leut oder gu^et, gesu^echt vnd vngesu^echt, gepaun oder vngepaun, wie daz genant sey, vnd auch andre lehen, die zu^e der egenanten vest nicht geho^erent, von wem die der egenant Chunrat der Vngenad ze lehen gehabt hat oder wa sie gelegen sein oder wie daz genant oder gehaizzen sey, an alain auz geczogen des zehenden, der pey der Geyl gelegen ist, der von Swanken herchomen ist, vnd ain hu^eb, die darzu^e geho^ert, also beschaidenleichen vnd mit auzgenomner red, daz wier vns der egenanten vest vnd auch aller der lehenschaft, die der egenante Chunrat der Vngenad gehabt hat, als var an disem prief geschriben stent, verczeihen vns gar vnd gênczleich also, daz wier vnd alle vnser erben oder nachchom furpaz ewichleich chain ansprach noch vadrung vm die egenanten vest vnd lehen, als var verschriben ist an disem prief, nicht haben schullen noch mu^egen, Vnd haben wier von in darvm emphangen sechs hundert march agler phening, der wier gar vnd genczleich von in gewert vnd bericht seyn. Daz in diseu gelu^ebd also sta^et vnd vnczeprochen peleib, daz loben wier in vnuerscheidenlaichen pey vnsern trewen an allez geuerd. Vnd darvber zu^e einem vrchund vnd geczeug der warheit geben wier in diesen offen prief versigelten mit vnsern anhangenden jnsigeln vnd auch mit der erbern leut hern Hainrichs von Muntpareis zu^e den zeyten phleger in kernden, Hern Rainhers des Schenchen von Osterwicz vnd hern Hainreichs des Raspen anhangenden insigeln, die iere insigel durch vnser pet willen in an schaden zesampt vnsern insigeln auf disen prief gehangen habent. Der prief ist geben nach Christes gepu^erd dreuczehen hundert iar, darnach in dem acht vnd vierzicschstem iar des suntags an sand Thomans tag.

Source Fulltext: OÖUB 7 (Wien 1876), S. 85f., Nr. 87