Ich Perichtolt Schefolt vergich vnd tu^en chu^ent, daz ich geschafft vnd geben han mein haus in der Hopfen Straz gelegen, daz ich vmb funfczehen phont gechaufft han zu dem ewigen lieht durch meiner sel vnd meiner hausvrowen sel vnd Perichtolcz meins vetern sel vnd vnsrer chind sel willen, daz ewichleich prinen schol var vnsern vrowen alter in der abseiten der pfarre stathalben tag vnd nacht, also wer zehmaister do selben ist, der schol daz selb lieht von dem haus vnd hoff haben also, daz ez fürbaz ewich vnd vnuerchumbert schol beleiben. Dar vmb so antwu^ertt ich disen prief in der erbern purger puchsen vnd pitt auch allev dev, di nv sind oder chonftig werdent, daz si mir dar an geholfen sind, daz daz gescheft vnd daz selb haus vnd hof stet vnd vnuerchvmbert beleib — im zweiten Exemplar: — vnd enphiel in daz auf ir trewe. Daz di red vnd daz gescheft also stet vnuerchumbert beleib — dar vber so gib ich vorgenanter Perichtolt den offen prief zu einem eiwigen sichtigen warren geczevg der sach mit meinem anhangunden insigel bestetigt. Der red schollen allev levtt geczevg sein. Der prief ist geben, da von man zalt von vnsern herren Jhesen Christi gebu^erd drevczehen hundert jar vnd in dem newn vnd vierczigsten jar an sand Michelstag.

Source Fulltext: OÖUB 7 (Wien 1876), S. 140, Nr. 141