Wier Chalhoch, Vlreich vnd Haug brueder von Valchenstain tuen chunt offenbar mit disem brief, das wier wolbedacht vnd nach rat vnserr vreunt gegangen sein vmb all vnser chrieg, di wier haben mit einander vmb vnser vest tzdem Rannarigel vmb all vnser auflaeuff, schaden, gult, nutzz, chost vnd raittung hinder vnser vreunt die erbern herren hern Arnolden von Maessenhausen, hern Chunraten von Tannberch, hern Fridreichen von Praitenekk, hern Jansen von Rochenstain, hern Lienharten von Marspach vnd Gotfriden von Talhaim also, das wier di selben segs herren tzesamm pringen schuellen gein Pazzawe tzehant, vnd vnser gnaediger herr byschof Gotfrid aller schierist von wienn gein Pazzawe chuemt, darnach in acht taegen, vnd haben wier auch all drei gesworn auf dem brief, das wier all staet haben schuellen bey vnser ayden, was si veber all vnser sach sprechent, das wier das mit nicht veberuaren noch sprechen dhainen weis noch da wider choemen mit worten noch mit werhen. Vnd schuellen si dann paidenthalben all vnser sach vnd chrieg verhoeren vnd darueber sprechen nach ieren trewen, was si fueglich vnd rechtleich duncht, vnd schuellen wier das staet haben an alles geuaer, als oben geschriben stet, waer aber, das der segs schidlaeut ainer oder tzwen ab gieng vnd nicht chomen mochten vaer ehafter noet, des Got nicht geb, so schullen di vbrigen vier nemen ainen oder tzwen ander erbaer man an gevaer an diser stat, vnd schullen di vollen gewalt haben tzehoeren, tzesprechen, tzeschaiden in aller der mazz, als di getan scholten haben, an der stat si sind genomen. Vnd was die segs oder der merar tail in sprechent oder schaident, da schol es gaentzleich bei beleiben vnd schuellen wier das staet haben in aller mazz, als oben geschriben stet, an als geuaer bei vnsern ayden vnd bei vnsern trewen. waer aber, das sich di vorgeschriben segs schidmann nicht gesinnen moechten vnd tzechrieg wuerden oder auf zwen tail geuielen, so schuellen si nach ieren trewen an geuaer nemen einen obman vnd schol der ainen tail zue geuallen vnd was denn der selb merar tail spricht umb all vnser sach, da schol es gaentzleich bei beleiben an alles geuaer vnd staet sein in aller mazz, als oben geschriben ist. welicher aber vnder vns das veber fuer vnd nicht staet hield oder des abgieng, der schol mit sein selbs leib vnd mit einem pidibem (?) vnd mit vier phaerden hie tze Pazzawe in ein offens gasthaus vaeren vnd dar inne laisten, als laistens recht ist, vnd da nicht aus choemen, vntzen das di obengeschriben sach volfuert werden, taet er des nicht, so waer er manayd vnd pruechig an seinen trewen. Darueber tze warem vrchund geben wier disen brief besigelten mit vnser dreyer anhangunden insigeln. Der ist geben tze Pazzawe nach Christi gepuerd dreuczen hundert jar, dar nach in dem naeun vnd vierczkisten jar an sand Erharts tag.

Source Fulltext: OÖUB 7 (Wien 1876), S. 89ff., Nr. 91