Wir Wernher von Gotz genaden probst ze Ranshofen vnd der gancz conuent dez selben goczhaus veriehen offenleiclien an disem gegenbu^ertigen brief vnd tu^enn chunt allen den, di in ho^erent, sehent oder lesent, Daz wir mit vnserm gu^etem willen vnd nach rat vnd mit gunst vnsers conuencz recht vnd redleich an alle ansprach ze chauffen gegeben haben dem erbern manne hern Hainrich dem Schikchen ze den zeiten richter ze Wels vnd seinen erben vnser perchrecht, das wir gehabt haben ze Chritzendorf, das gelegen ist ob Neunburch chlo^esterhalb vnd des vierczk emmer vnd sybenthalb emmer most ist vnd naeun vnd dreizk pfenning alter wienner mu^enzz vnd das vnser rehtz aigen gewesen ist. Das selb aigen vnsers perchrehcz haben wir in auf gegeben mit aller staet, mit allen den rehten vnd nu^etzen als wirs gehabt haben, aus unsern nu^etzen vnd gewern in di irn mit alle dev, vnd dar zu^e geh^ert, versu^eht vnd vnuersu^echt, vmb ain gu^et, des wir gar vnd gancz von in gewert sein, vnd schullen von des vorgenanten perchrehts ir gewer sein, nach des lanczreht ze O^esterreich vnd der stat reht ze Neunburch chlosterhalb iar vnd tag vnd was in dar an ab get, das schu^ellen si haben dacz vnsern trewn vnd auf anderr vnser hab, wa wir di haben, versu^eht vnd vnuersu^eht. Das in di wandlung vnd di gelu^eb von vns also staet vnd vnuerchert beleiben, dar vber geben wir in ze ainem warn vrchunt disem brief mit vnserm vnd vnsers conuencz anhangundem insigel versigelt. Das ist geschehen nach christes gepu^erd v^eber drewczehen hundert iar, dar nach in dem naeun vnd virczkistem iar an sand Pauls tag, als er bechert ward.

Source Fulltext: OÖUB 7 (Wien 1876), S. 92f., Nr. 93