Venerabilibus in Christo patribus, amicis et confratribus suis sincere dilectis dominis Dietmaro honorabili preposito, Syfrido decano totique conuentui ecclesie Reycherspergensis, Pataviensis dyocesis, Vlricus sola permissione divina prepositus, Guntherus decanus totumque collegium monasterii Vorowiensis Saltzburgensis dijocesis cum deuotis orationibus sinceram ac fraternam in Domino caritatem. Cum secundum beatum Augustinum Caritas sit mentis affectus ad Deum et proximum feruenter et ordinate porrectus sitque sanctis animabus in operimentum contra passiones tribulationum, munimentum contra temptationes peccatorum, in ducatum quantum ad operaciones virtutum orationes mutue suffragantur, scire volumus vos vniuersos et singulos, quod eadem caritate et amore contra vos ardentissima inflammati omnium bonorum, que in nostra ecclessia prefata Domino cooperante fiunt, missis, orationibus, vigilijs, jejunijs, elemosinis ac alijs quibuscunque bonis vos participes esse volumus tam presentes quam futuros, tam in morte quam in vita statuentes de nostri capituli communi consilio et consensu, quod prelatorum vestrorum deposiciones sicut nostrorum prelatorum vigiliis et missis pro defunctis cum choro cantatis et flagello a quolibet fratre sumpto et sacerdote quolibet missa specialiter habita deuote et sollempniter peragantur. Item dies deposicionis canonicorum et confratrum modo simili celebretur ita tamen, ut dies obitus istorum nobis prout vobis infra spatium duorum mensium declaretur. Sed et memoria omnium defunctorum fratrum semel in anno hoc est in vigilia sancti Andree Apostoli, ut prius expressum est, per omnia teneatur, et quia secundum canonica instituta siue mandata spiritualia efficacius gerimus, si nostra cum fratribus onera parciamur et tucius est in misericordiam quam in seueritatem declinare, ideo adicimus et inviolabiliter a nobis et nostris successoribus volumus non infringi, si quod absit aliquis ex vobis casu aliquo extra vestrum cenobium emitti contingeret, quod tunc vnum vel duos vestrum pro possibilitate nostra ad tempus reformacionis et reconciliacionis nobiscum fideliter teneamus et fraterne. Vt autem huiusmodi communicacio seu fraternitatis compromissio rata a nobis et nostris successoribus ac firma in posterum perseueret, vobis presens scriptum transmittimus memorati prepositi et capituli nostri sigillorum munimine roboratum. Datum in Vorowe anno Domini M° ccc° xl° nono in prima vespera beate Marie Magdalene.

Source Fulltext: OÖUB 7 (Wien 1876), S. 112f., Nr. 114