Ich Alhait von Storchenberch vergich vnd tuen chunt allen den, di disen prief ansehent oder horent lesen, di nv sint oder noch chumftig werdent, daz ich mit wolwedachtem muet vnd mit gunst aller meiner eriben willen zu der zeit, do ich ez wol getuen mocht, geschafft han den den (sic) weingarten, der da haizzt der Reiber, der gelegen ist in dem Mupach ze Spitz, den ich chauft han vmb mein aigenhaftew hab, zu der chappelln in dem Chirchslag nach mein tod also, daz er dapei weleiben schol ewichleich, vnd wer die chappelln inn hat vnd dem si verlichen wirt, der schol vns all jar davon wegen einn jartag all jar virzehen tag vor sant Mychels tag oder virzehen tag hinnach mit fu^emf messen, der schol ainew sein ein gesungens selampt vnd ein gesungen ampt von vnser vrawn vnd drey gesungen mess mir vnd mein Gundachern (sic) vnd alln vnsern vodern vnd allen vnsern nachchomen. waer aber daz tan, daz ez wurd verzogen, daz der jar tag niht volpracht wurd, alz vor geschriben stet, so (sollen) sich dann mein erben dez ee genanter (sic) weingarten vnderwinden vnd schullen in innhaben alz lang, vntz daz der vorgenant jartag wegangen wirt vnd volpracht, als vor geschriben stet; wann daz selb dann geschiecht, so schol man dann den egenanten weingarten hinwider antwwten. Daz di red also staet vnd vnverchert weleib, so gib ich vorgenante Alhait von Storchenberch disen prief ze einem waren vrchv^end versigelt mit meins suns Gundachers insigel von Storchenberch vnd mit meins suns jnsigel Ortolfs dez Pybers. Der prief ist geben, do man zalt von Christ gepurt drewzehen hundert jar vnd in dem nawn vnd viertzigistem jar dez nachsten vreitagg vor sant Steffans tag ze Wilperch in dem Haus.

Source Fulltext: OÖUB 7 (Wien 1876), S. 120f., Nr. 121