Wir graf Chu^onrat von Schaw^onherch veriehen vnd tu^on chu^ont allen den, di disen brief lesent oder ho^erent lesen, di nü lebent vnd her nach chu^onftich sint, vmb den hof gelegen ze Siczendorf vnd vmb allez daz, daz dar zv gehört ze velde vnd ze dorff, ez sey gestifft oder vngestifft, versucht vnd vnuersucht, swi so daz genant ist, den der erber herr her Vlreich von Pergaw von vns ze lehen hat, daz wir dem selben herren Vlreich von Pergaw die genade getan haben vnd tun auch mit disem brif, daz wir im vnd seinen erben payden svnen vnd töchtern den vorgenanten hof vnd swaz dar zv gehört, als ez allez von alter her cho^emen ist, recht vnd redeleichen verlihen haben zv rechtem lechen nach dez landes recht ze O^esterrich also, daz der selb her Vlreich von Pergaw^o vnd alle sein erben baidew sv^en vnd töchter süln fürbaz mit dem eegenanten hof vnd mit allew dew ynd dar zv gehört, ledichlichen vnd freylichen allen iren frümen schaffen, verchauffen als lehens recht ist ynd dez landes recht ze O^esterreich. Vnd sein auch wir vnd vnser erben vnuerschaidenlichen dez obengenanten hofs vnd allez dez, vnd dar zv geho^ert, hern Vlreichs von Pergaw vnd seiner erben baydew su^on vnd töchter recht lehen herren vnd gewern vnd scherm, als lehens recht ist vnd dez landes recht ze O^esterrich. Vnd daz dise lehenschaft furbaz also stät vnd vnzerbrochen beleib, dar über geben wir in disen brief ze einem waren sichtigen vrchu^ond diser sache versigelten mit vnserm jnsigel vnd mit vnsers brüder jnsigel brüder Heinreichs graf von Schaw^onberch Sand Johans ordens, der diser sache gezeüg ist mit seinem jnsigel. Diser brief ist geben nach Christes gepu^ortt drewtzehen hundert jar, dar nach in dem fumftzigistem iar an sand Mathias abend.

Source Fulltext: OÖUB 7 (Wien 1876), S. 173f., Nr. 172