Ich Haertneyt von Weizzenekke vnd alle mein erben vergehen vnd tuen chunt offenlich mit disem brief allen den, di in sechent, lesen oder ho^erent lesen, di nv lebent vnd her nach chumftig werdent, daz vns her Stephan von Sla^et vnd alle sein erben verricht vnd gewert habent der zwaier hvndert pfunt gelts, di sev vns zu dem haus ze Sla^et ze chauffen gegeben habent, der hvndert pfunt pfennig gelts in v^erbar gelegen sint an verlechentem gu^et, vnd habent auch vns des verricht vnd gewert in paiden pfarren ze Pranperch vnd ze Wissmad. Vnd sol auch ich vorgenanter Haertneyd von Weizzenekke vnd alle mein erben gegen hern Stephann von Sla^et vnd gegen seinen erben furbazz vmb daz gu^et vnd vmb alles daz, daz sev vns zu dem haus ze Sla^et vnd in paiden pfarren dar zu^ee, als vor benant ist, ze chauffen gegeben habent, dhain ansprach nimer haben, nach dhain voderunge vmb dhainen abganch des gu^ots, daz vor geschriben stet, ez sey ze veld ader ze do^erff, ze holtze, gestift ader vngestift, versu^echt ader vnuerschu^echt (sic), swie so daz genant ist, denn als vil, swazz vns mit recht vnd mit vrag vnd mit v^ertail an behabt wiert an dem vorgenanten gu^et, Daz sulle wier ich vorgenanter Stephan von Sla^et vnd mein erben hern Haertneyden von Weizzenekke vnd seinen erben auzzrichten vnd wider chern an allen ieren schaden. Vnd des ze einem offen v^erchunt geb wier disen brief versigelt mit vnserm jnsigel vnd mit der erbern berren jnsigeln hern Fridreichs des Heusler vnd hern Dietreichs von Hohenberch, die diser sach gezeug sint mit jeren jnsigeln. Der brief ist gegeben nach Christes gepurd dreutzechen hundert jar, dar nach in dem fvmftzkistem iar des svntages in der andern vastwochen, als man singet: Oculi mei semper.

Source Fulltext: OÖUB 7 (Wien 1876), S. 177f., Nr. 175