Ich Ott, ich Nycla, ich Agnes, ich Margret Dyetreichs chinder dez Hu^elber dem got gnad veriehen offenbar an dem prief daz wir mit gunst vnd willen dez erbern herren herrn Dyetmars, probstz ze Reichersperig vnd dez conuentz do selben haben ze chauffen gegeben alle vnser reht, di wir haben gehabt von dem e genantem gotzhauzz auf den hof datz sand Valtein pei der Ens, gehaizzen der Hu^elbhof, Hainrich dem Winnen vnd seiner hausfra^ewn Margreten vnd allen i^ern erben di sie iezunt habent oder noh gewinnent also, daz der vorgenant Hainrich vnd sein hausfra^ev Margret oder ir erben von dem e genantem hof aller ia^erchleich dienen schullen ze rehtem dienst zwelif schilling wienner pfenning vnd zehen schilling wienner pfenning fu^er drei nachtseld, di vor auf dem hof gelegen sint an sand Michelstag vierzehen tag vor oder nah. Ta^eten si dez nicht, so wa^ern si gevallen ze wandel immer vber viertzehen tag sechczig wienner pfenning. Verzugen si datz ein gantz iar, so schol man sev pfenden vmb den vor verschriben dienst vnd vmb di wandel, vnd hat dann der e genant probst vnd daz gotzhaus den e genanten hof ze leichen, wem si wellent an all wider red, iz schol auch der offt genant Hainreich vnd sein hausfra^ev oder ir erben den hof nicht tailen, noch ire recht versetzen noch verchauffen, si pieten den chauf oder den satz daz gotzhaus e an vor andern lewten. Mo^eht den daz gotzhaus den hof nicht gelo^esen noch gechauffen, so hat der e genant Heinrich, seine hausfrav oder ir erben gewalt ir reht auf dem selben hof ze versetzen oder verchauffen mit irr hant einem gleichem pavmanne, da si ir vodrung mugen von becho^em. Si schullen auch getriw sein dem gotzhaus als ander holden durch recht schullen. Ze v^erchunt gehen wir in disen brief versigeltem vnder dez erbern mannes Albrechtz dem Wolfstains anhangunden insigel. Der gegeben ist dreyzehen hundert iar dar nah in dem fu^emtzigisten iar an sand Lienhartz tag.

Source Fulltext: OÖUB 7 (Wien 1876), S. 210f., Nr. 210