Ich her Nycla ab dem Espan vnd mein hausfrawe Preid vnd mit vns alle vnser erben wir veriehen daz mein vodern vnd ich geben haben hin pfunt pfenning geltes alter wienner munzze, das wir haben auf der Leupoltinn haus in der Juden strazz, daz man allev jar jerichleich reicht an sand Jorigentag, daz haben wir geben in das alt spital, also daz man alle jar jerichleich dar vmb chauffen schol leinen tuech, vnd schol daz tailen vnder sev alz verr daz gelangen mag. Ich schol auch vnd mein erben vnd waz vnsers geslechtes ist, daz vorgenant phunt pfenning geltes in daz vor genant spital selber geben. Wer auer daz getan, daz wir oder vnser nach chomen mit dhaynerlay sachen dar an savmig wurden, so schol iz der rat, der ze den zeiten in der stat ist, der schol daz selb pfunt geltes auch raichen in daz vor genant spital alz wir haben getan vmb leinen tuech, dez pitten wir sev innerchleich durch Got. Wir schullen auch dhain widerred daran niht haben mit nihte niht wir oder vnser erben. Daz in di red stet vnd vnuerchert beleib, dar vber gib ich in disen offen gegenburtigen brief versigelt mit meinen anhangunden jnsigel ze einer bestetnuzze vnd sicherhait ditz priefs. Der prief ist geben dreuzehen hundert jar vnd dar nach in dem funftzikisten jar an sand Elspetten tag.

Source Fulltext: OÖUB 7 (Wien 1876), S. 212, Nr. 211