Ich Hainreich der Neydekker vnd ich Dietreich der Gu^effinch sein aydem vnd ich Anna sein hausurowe wir vergehen vnd tu^en chunt allen den, di disen brief lesent oder ho^erent lesen, di nv lebent vnd hernach chu^enftig sint, daz wir mit vnser erben gu^eten willen vnd gunst mit verdachtem mv^et vnd mit gesampter hant zu^e der zeit, do wir es wol getu^en mochten vnd mit vnsers gruntherren hant hern Jacobs des Pollen zu den zeiten chapplan der chappellen vnser Vrowen in der purger rathaus ze Wienne, hern Otten Haymen stiftunge, dem Got genade, verchauft haben vnser haus gelegen auf der hocbstrazze ze Wienne an der Augustiner vreythof, da man von demselben vnserm haus alle iar dient der egenanten chappellen vnser Vrowen zwen vnd viertzich wienner phenninge ze gruntrecht, vnd von einem chlainen flekchen hinden des hofs der pharrchirichen sant Michel drey phenninge, vnd hern Haunolden dem Schuhler vier phunt wienner phenninge ze purchrecht vnd nicht mer. vnd die selben vier phunt geltes sint ab ze lo^esen mit zwaintzich marchen silbers oder mit viertzich phunden wienner phenningen. Daz vorgenant haus haben wir recht vnd redleich verchauft vnd geben mit alle dem nutz vnd recht, als wir es ju purchrechtes gewer her pracht haben, vmb zway hundert phunt wienner phenninge, der wir gar vnd gaentzleich gewert sein, dem erbern herren hern Vireichen von Pergawe vnd seinen erben furbaz ledichleichen vnd vreyleichen ze haben vnd allen irn frumen da mit ze schaffen verchauffen versetzen vnd geben, swem si wellen an allen irresal. Vnd ze einer pezzern sicherhait so setzen wir vns ich Hainreich der Neydekker vnd ich Dietreich der Guffinch sein aydem vnd ich Anna sein hausurowe vnd vnser erben vnuerschaidenleich u^eber daz vorgenant haus dem egenanten erbern herren hern V/elreichen von Pergawe vnd seinen erben ze rechten gewern vnd scherm fu^er alle ansprach, als purchrechtes recht ist vnd der stat recht ze Wienne. Waer aber, daz si mit recht an dem selben haus icht chrieges oder ansprach gewunnen, swaz si des schaden nement, daz suln wir in alles ausrichten vnd wider chern an allen irn schaden, vnd suln auch si daz haben auf vns vnuerschaidenleich vnd auf allem vnserm gu^et, daz wir haben in dem lande ze O^esterreich, wir sein lebentich oder tode. Vnd daz diser chauf fu^erbaz also staet vnd vnzerbrochen beleibe, darv^eber so geben wir jn disen brief zu^e einem warn vrchu^ende vnd zu^e einer ewigen vestnunge diser sache versigilt mit vnsern jnsigiln vnd mit des gruntherren jnsigil des vorgenanten hern Jacobs des Pollen vnd mit hern Weycharts jnsigil bei den Minnern Pru^edern ze Wienne vnd mit hern Dietreichs jnsigil des Fluscharts zu den zeiten purgermaister ze Wienne vnd mit hern Sigharts jnsigil des Prunner, die diser sache gezeuge sint mit irn jnsigiln. Diser brief ist geben ze Wienne nach Christes gepurt dreutzehen hundert iar, dar nach in dem ayns vnd fu^emftzgisten iar an vnser Vrowen abent der schidunge.

Source Fulltext: OÖUB 7 (Wien 1876), S. 260f., Nr. 255