Ich Ott von Chornspach vnd mein erben verichen mit dem prief allen den, di in sehent oder horent lesen, daz wier haben ze chauffen geben vnserm lieben herren hern Reinprechten von Waltse vnd seinen erben ein biss ze Plu^emawe vnd ein tagwerch bissmat ze Talarn, daz vnser vreys aigen ist, vmb ein guet, des wir gantz vnd gar gewert sein ze rechten taegen. Wir sein auch derselben biss ze Plumawe vnd des tagwerch bissmat ze Talarn gewern, als aygens recht ist in dem lande ze O^eesterreich. Naemen sev darvber schaden mit recht, den selben schaden schulle wier in abtu^en vnd ablegen vnd schullen in haben auff vns vnd auff aller der hab, die wier haben in dem lande ze Osterreich. Wer daz iemen der egenanten biss ze Plu^emawe vnd des tagwerch bissmat ze Talarn erbe wolt sein, der sol geben meinem genedigem herren hern Reinprecht von Walse oder seinen erben zwai vnd aechzzich phunt phenning, vnd sol die biss ze Plu^emawe vnd daz tagwerch bissmat ze Talarn danne ledich sein. Daz in die red also staet vnd vnuerchert beleibe, dar vber geb wier in den prief ze einem offen vrchund vnd ze einem waren zevg bestaetigt mit meinem anhangvnden insigel, vnd ze einem zevg versigelt mit hern Weicharts insigel von Perennawe vnd ze zevgen versigelt mit meins lieben vrevnt insigel Otten von Flachenekk vnd mit meins vetern insigel Otten von Pernnawe, die sein zevg sint mit irren anhangvnden insigeln. Geben nach Christi gepu^erde drevzehen hundert jar, dar nach in dem ainsunfu^emfzzichgistem jar des eritag nach sand Jacobstag.

Source Fulltext: OÖUB 7 (Wien 1876), S. 257, Nr. 253