Ich Jans von Chappell vnd ich Vlrich von Chappell sein svn vnd all vnser erben wir veriehen offenbar an dem brief vnd tuen chunt allen den, die in sehent, horent oder lesent, di nv lebent oder hernach chunftig sind, daz die beschow vnd die schatzung vmb Slierbach geschehen sol nach svnnbenten, die schierist choment vber acht tag dacz Slierbach, vnd vf den selben tag sullen die vier hinchomen, die vnser herr der hertzog von Osterrich dar zv^e geschaft hat. Wer aber, daz der ainer oder mer abgieng vnd nicht dar chem, so sullen die andern einen andern an seiner stat nemen, vnd sol graf Leotold von Schownberch tuembrobst ze Freising der fvnft sein zv einem vberman. Vnd ob der ouch abgieng, so sullen die vier ainen vberman nemen nach iren trewn, vnd sol die sach vnd die schatzung vmb Slierbach gancz vnd gar da selbs gericht vnd geendet werden. Wer aber, daz wir die oben geschriben sach vf den vorgenanten tag nicht volfuerten, darvmb haben wir zvsampt vns ze porgen gesatzt graf Ybann von Pernstain, hern Friderichen von Waltse ze Ens, hern Eberharten von Waltse ze Drozendorf vnserm liben vrewnd hern Eberharten von Walse zden ziten houbptman ob der Ens vnd seinen erben also beschaidenlich, daz er vnd sein erben vollen gebalt habent vns mit sampt vnsern porgen ze manen gen Lintz ze laisten jn ain erber gasthows, vnd sol im vnd seinen erben daselbs iederman einen erbern chnecht mit zwain pferften (sic) inlegen vnd laisten als laistens recht ist, vnd da nicht ouzchomen, ez werd e volfuret jm vnd seinen erben allez daz, daz oben verschriben ist. Daz die sach also stet vnd vnuerchert beleib, darvber geb wir jm vnd seinen erben hie den offen brief versigelten mit vnsern anhangunden insigeln vnd mit vnsrer porgen insigeln. Der brief ist geben ze Wels nach Christes geburd drewtzehen hvndert jar, vnd in dem zwai vnd funftzichstem jar, des pfintztags an vnsers herre leichnam tag Jesv Christi.

Source Fulltext: OÖUB 7 (Wien 1876), S. 283f., Nr. 278