ICH Reyprecht (sic) vnd ich Fridrich paid pru^eder von Waltse datz Ens vnd ich Perchtolt von dem Losenstayn vnd ich graf Hans von Pernstayn wir veriechen offenleich vnd tu^en chunt allen den, di disen prief ansechent ho^erent oder lesent, daz wir vnuerscheydenleichen porg sein worden herrn Eberhartz von Waltse haubtman ob der Ens vnd seiner erben vm daz haus ze Reychenstayn, daz der vorgeschriben her Eberhart von Waltse hern Vlreichen von Chappeln vnd seinen erben ze chaufen hat geben vm dre tausend phunt vnd vm sechshundert phunt phenning alter wienner mu^entz mit allen den nu^etzen vnd rechten, vnd herschaft vnd vo^ersten vnd vischwayd vnd wiltpen, die darzu^e geho^erent besu^echt vnd vnbesucht, vnd scholl auch der obgenant her Eberhart von Waltse hern Vlreichen von Chappeln vnd seinen erben dorzu^e geben dreuzig phunt herren gu^elt vnd zwaynzig phunt geltz auf gestiftem guet in vrbar mitt allen den nu^etzen, die dorauf liggen sind oder geuallen von dem tag heut, vnd schol auch im darzu^e geben drithalbhundert phunt geltz verlehentz, daz ritter vnd chnecht von im haben ze lechen, vnd schol auch im geben achtzig phunt geltz vnd drew phunt geltz verlechentz, daz paurn von im haben. Im schol auch der vorgeschriben her Eberhart von Waltse vnd sein erben alles daz richtig machen, das verschriben stet an disem prief, vnd auch allew stet mitt herren hant dorzu^e tu^en, der er dorzu^e bedarf, dem vorgeschriben hern Vlreichen von Chappeln vnd seinen erben zwischen hin vnd sand Michels tag, der nu schirst cho/omt, an allen chrieg. Wer aber daz, daz dem vorgeschriben hern Vlreichen von Chappeln ynd seinen erben doran icht abgieng vnd nicht volfu^ert werd, daz yorgeschriben stet an disem brief, so schu^ell wir in vier erwer rittermezig chnecht inlegen ider man selbander vnd ider man mitt zwayn pherften gen Lintz oder gen Ens in ein offen gatshaus, swo si vns hin vardern her Vlreich oder sein erben, ynd schu^ellen di (sic) laysten an als gever, als laystens recht ist, vnd nimer aus cho^emen, iz werd e volfu^ert hern Vlreichen von Chappeln vnd allen seinen erben allez, daz vorgeschriben stet an disem prief. Daz in disew red stet vnd vnverchert beleib, dorv^eber geb wir in disen prief versigelten mit vnser vierr anhangunden jnsigel zu^e aynem waren vrchu^end der vorgeschriben sach. Der prief ist geben, do man zalt von Christs gepu^ert tausend jar vnd dre hundert jar, darnach in dem zway vnd ffu^entzigisten (sic) jar an vnsers herren leychnams tag.

Source Fulltext: OÖUB 7 (Wien 1876), S. 285f., Nr. 281