ICH Chunrat der Viedo^erffer vnd ich Ians der Viedorffer sein prueder vnd alle vnser erbm wier veriehen an disem prief vnd tu^en chunt allen den, di in ansehent oder ho^erent lesen, di nu lebent oder hernach chu^emftig sind, daz wir mit wolverdachtem mu^et vnd mit gunst aller vnserer erbm ze der tzeit, do wier das wol getu^on machten, versast haben vnsers gu^etz ein hofstat, dew do leit datz Lostorf, vnd dev rechtz lehen ist von dem ho^echgeparn fu^ersten hertzog Albrecht. Also haben wiers versast mit vnsers lehen herren hant vnserm besundern vreunt Speten van Warthausen ze den tzeiten lantrichter ze Peilstain vnd vern Katrein seiner hausuravn vnd ier paeder erbm mit allen den nu^ettzen vnd rechten, vnd zv^e der vargenanten hofstat geho^ert, gestift oder vngestift, versu^echt oder vnuersu^echt, ze do^erff vnd ze veld, wie so das genant ist. es ist auch ze den tzeiten auf der vargenanten hofstatt gesessen Hainreich der Plachner. Also hab ins versast fu^er sechs phunt wienner phenning, der wir van in gantz vnd gar gewert sein also beschaidenleich, das sev das vorgenant gu^et scbullen inne haben ze einem rechten satz, als satzung recht ist vnd des landes gewanheit jn O^esterreich vntz van dem sunibent tag, der nu schierist chu^emftig wiert, vber vier iar. Is scbol auch in den vier iarn alle iar lo^esung sein am sunibent tag. Wer awer, das dev vargenante vier iar aus cheemen, das wier nicht lo^esten, als var geschriben stet, so schol is fu^erbas ier rechtz chauf gu^et sein allen ieren frumen do mit schaffen mit verchauffen vnd mit versetzen vnd gebem, wem sev wellen an alle ierrung. Wier sein auch des vargenanten gu^etz ier rechter gewer vnd scherm fu^er alle ansprach, als lehens recht ist vnd gewanhait jn O^esterreich. Na^emen sev dar vber indert einen schaden mit recht an dem vargenanten gu^et, den schu^ellen wier in ab legen gantz vnd gar, vnd schullen sev das haben auf vns vnd auf allem dem gu^et, das wier haben in dem land ze O^esterreich, wir sein lemtig oder to^ed. Hiet awer in nicht alles das stêt (sic), das an dem prief geschriben stet, wer danne ze den tzeiten landes herr ist jn O^esterreich oder haubtman an seiner stat, der schol in phant geben van aller vnserer hab als vil, do van sev haubtgu^etz vnd schaden wol becho^emen mugen an schlag vnd an fu^erbot vnd an alles recht mit vnserm gu^etleichen willen. Das dev red also stêt vnd vnzebrochen beleib, dar vber geb wier in disen prief zv^e einem v^erchund der warhait diser sach versigelt mit vnser paeder anhangunden jnsigeln; vnd sind auch der sach getzeug Ott der Rarbekch vnd Gundakcher der Vêuchsner mit ieren anhangunden insigeln. Der prief ist geben nach Christi gepu^erd dreuczehen hundert iar, dar nach in dem zway vnd fumftzigistem iar an sand Veitz tag.

Source Fulltext: OÖUB 7 (Wien 1876), S. 287f., Nr. 283