Wir apt Gerlach vnd der conuent dez chlasters zu Lylienweld veriehen vnd tuen chvnt mit disem brief allen den di in sehent oder horent lesn, daz der edel vnd erber herre her Stephan von Slet, dem Got genad, vns vnd vnserm chloster lautterleich durch Got vnd durich seiner sel hael vnd seiner hausvrowen vrowen Annen vnd durch aller seiner vadern sel hael willen mit wol verdachtem muet vnd rat vnd gvnst seines svns hern Offen vnd mit gvetem willen seiner nahsten vrevnt zu der zeit, do er daz wol getven machte, gegeben hat ain haus gelegen zu Wienne in der Schenchenstrazze an dem ek pey der Potendarffer haus, daz wir auch verchauft haben dem erbern herren hern Gotschalichen von Neytperch vmb acht vnd sechzig phvnt phenning wienner mûnzze also beschaydenleich, daz wir alle iar in vnserm convent von dem selben gv^et ainen jartag begen schvllen dez nahsten tags nah sand Phylipps tag, als seines vaters iartag hern Offen, dem Got genad, nah vnsers ordens gewonhait mit gepet mit vigily mit mezse vnd mit ainem tebych vnd mit vier cherczen zu vigili vnd zu mesze durch besvnder andacht. Iz schol auch hern Stephans svn von Slet, ob er wil zu dem jartag chomen mit sechs pherten vnd nicht mer, oder sein schaffer mit drin vnd nicht mer, ynd schol man ymmer zwaen pherten geben ainen metzen habern, jz mag auch sein schaffer in dez convenz oder dez aptz cheler gen vnd chosten dez pesten weins, dez schol man dez morgens geben dem convent vnd semeln vnd drev stuch visch; wurd aber daz an ehaft no^et versaumet, so schullen sich die nachsten vrewnt her Off hern Stephanis svn vnderwinden fvmf phvnt geltz wienner phenning vnsers rechten aygens so lang, vncz daz die savmpthait gepezzert werde. So schvllen vns vnserr gv^elt ledich sein an alle ansprach, die wir in also auszaygen pey vnserm chloster gelegen dacz Raydenveld Hainreich vnder dem wald dienet fvmf vnd dreyszig phening, Huppelhof fvmf vnd vierzig phenning, Sneyder am O^ert fvmf schilling, Alhayt vnd Wolfger fvmf schilling, Wogenfu^es sechszig phenning, Stephan zu den Veylern aecht vnd dreysig, Mulnner in der Scheyben ain halb phvnt, Mul in der Awe vierdhalben schilling, Mulner dacz Radichaw dreizich phenning, Chvnrat am Steg sechszig, Hainreich da selbes zwelif phenning, Peter auf dem Pach zwainzig phenning, O^ertolf auf dem Grillenperig fvmf vnd vierzig phenning, Fridreichs witib dacz Mayrhouen dreyzich phening, der Drochselhof an der Stainwand ain phvnt, der Mawrer vnd sein sun sechszig phenning. Wier geluben auch durch besvnder vrewntschaft willen hern Stephans sun hern Offen, swo er in dem lande sturb, so schulle wir in mit vnserm wagen vnd mit vier priestern zu dem chloster fueren vnd pey vns begraben. Vnd daz daz alles also stete beleibe, gebe wir dorvber hern Offen von Slet diseri brief versigelten mit vnsern payden insigeln vnd mit vnsers weyser abt Chvnratz insigel von dem heyligen chreucz, den wir dorvmb gepeten haben. Der brief ist geben nach Christes gebuerd vber drevzechn hvndert iar in dem zway vnd fvmczigisten iar an sand Nyclas tag.

Source Fulltext: OÖUB 7 (Wien 1876), S. 292f., Nr. 287