Ich Eberhart von Starchenberch cho^erherr ze Pazzaw vergich offenbar mit disem brief vnd tu^en chund allen den, di in sechent oder lesen ho^ernt, daz ich mit wolbedachtem mu^et nach meiner vrevnt rat vnd gunst recht vnd redleich ze chauffen han gegeben meinen lieben bru^edern Gundakchern vnd Ru^egern von Starchenberch vnd allen iern erben den hof, der da haizzt der Mitterekk vnd leit pei Wiltperch, der mier ze eribtail geuallen ist, aus meiner nucz vnd gewer in di irn mit alle di, vnd darzu^e geho^ert ze holcz vnd ze veld, versu^echt vnd vnuersu^echt, vmb ein gelt, dez ich gar vnd gancz gewert pin. Ich pin auch dez vorgenanten hofs ier gewer, wo in dez no^et ist, als lancz recht ist. Taet ich dez nicht, swie viel schaden si dann dez nement, den schol ich in ablegen vnd schullen si daz haben auf mein trewn vnd darzu^e auf aller meiner hab, swo ich di han versu^echt vnd vnuersu^echt. Darvber ze v^erchund gib ich in disen brief gesigelten mit meinem anhangunden jnsigel vnd mit meiner lieben mu^eter jnsigel vrovvn Adelhait von Starchenberch vnd mit meins lieben bru^eder Ortolfs dez Piber anhangunden jnsigel, di dez chauffs redner vnd taydinger sind gewesen vnd auch ierev jnsigel an disen brief habent gelegt durch meiner pet willen zu^e einer zevgnuzz in an schaden. Der geben ist nach Christes gepu^erd drevczehen hundert jar vnd in dem drev vnd fumfczkistem jar an dem vreitag nach dem ebenbeich tag.

Source Fulltext: OÖUB 7 (Wien 1876), S. 294, Nr. 289