Wir Agnes von Gotcz genaden chvnigin ze Vngarn, pfhalczgrafin by Rin vnd herczogin in Baiern veriehen mit dem brief offenlicb, daz wir Rudojfen dem Schifer, seiner hansfrawen Annen vnd ier baider erben, ez sein to^echter oder sv^ene verlihen haben ze rechtem lehen allez, daz si von hern Poben von Hoholting ist an erstorben vnd daz er vnd sein erben von vns habent gehabt ze lehen, mit der beschaiden, wann er vnd sein hawsfraw nimer sind, so sullen ir erben allez daz von vns vnd von vnsern erben raichen, allz si habent getan, vnd sullen wir in dann leihen, allz pilleich ist; wann di abgingen, so sullen ez raichen di Pilgra^ems chind von Anhang von vns vnd vnsern erben. Dez ersten hab wir in verlihen den sitz ze Panczingen, ein hof ze Trawtmaningen, ein zehent haws ze Elling, ein zehent by der Pv^enach, ein gu^et ze Griessenawe; di guet vnd zehent hab wir in verlihen ze rechtem lehen mit alle dev, vnd darzu gehernt, besucht vnd vnbesucht; vnd waz her Poben von Hoholtingen erben vnd aidem noch vngetailter hab mit einander habent, waz si darauz angeuelt mit dem tail oder an ersturib mit dem dot, daz sein vogtay oder verlichne lehen, daz sullen wir in auch leihen, vnd welherlai frv^em si wellent saffen (sic) mit der oben verschriben hab vnd lehenschaft, daz sei mit verheiraten mit verchawffen mit versetzen, da sullen wir vnd vnser erben si oder ir erben nicht an irren. Daz in daz allez stat vnd vnzebrochen beleib, daz oben an dem brief verschriben ist, darvmb zu einem vrchund der warhait geben wir in den brief versigelten vnder vnserm anhangvnden jnsigel, der geben ist, do man zalt von Christus gepu^ertt drewczhen hundert jar vnd dar nach in dem drev vnd fv^entzigistem jar an sand Pawls tag, do er bechert ward.

Source Fulltext: OÖUB 7 (Wien 1876), S. 295, Nr. 290