Ich Gedraut hern Offen tochter von Arberch tu^en chunt mit disem prieff allen den, die in sehent oder ho^erent lesen, daz ich nach rat vnd gunst meiner pesten vreunt meim lieben wiert Hansen von Winden ze rechter widerlegung seins guets gegeben han vnd gemacht meins aygen guets sechs hundert pfunt alter wienner pfenning, vnd han in der geweist des ersten auf meinn tail der vest ze Pu^eten vnd waz dar zu^e geho^ert, als ich ez vntz auf den heutigen tag in nutz vnd in gewer her pracht han, vierdhalb hundert pfund pfenning, vnd in den Pu^eheln pey Wetschein ain vnd zwainzich march gelts fu^er zway hundert pfunt wienner pfenning, die mein recht mo^ergengab gewesen sint von hern Erasm seligen von Pernek meim vorderm wiert also auzgeuomleich, daz desselben gelts ain halb march gelts geuallen schol dem gotshaus ze Reün, als si der vorgenant her Erasm selig dahin durch seiner sel willen vnd durch der meinen zu aim ewigen jartag mitt anderm guet geschafft hat. Dar zu^e han ich in auch geweist auff zwo march gelts pey Wieltsch gelegen, die da dient achczehen ember weins fu^er zwainzich pfunt wienner pfenning, vnd auff ain hueb in den Püheln datz Dem schitz gelegen, die da dient achczehen ember weins ze czins vnd sechs ember ze perchrecht daselbs vnd ze Wyeltsch gelegen fu^er zehen march silbers oder fu^er achczehen pfunt wienner pfenning, vnd auch auf ain hueb ze Wieltsch, da der Drasme auff siczt, die da dient achczehen ember weins ze czins vnd sechs ember weins daselbs ze perchrecht fu^er zwen vnd dreyzzich guldein. Daz vorgenant guet han ich im allez gemaht also beschaidenleich, jst, daz wier chinder mitt ainander gewinnen, auf dieselben chind schu^ellen die vorgenanten sechs hundert pfunt pfenning geuallen nach vnser paider to^ed; wa^er aber, daz ich sturb vnd pey im an erben verfu^er, des Gott enwell, (sic) so schu^ellen die offt genanten pfenning auf in geuallen vnd schol er die innhaben nu^etzen vnd niezzen vnuerchumert vntz an seinn to^ed, vnd nach seinn to^ed schu^ellen sev herwider auf die nachsten erben geuallen. Vnd des zu aim vrchund der warhait gib ich im disen prieff mitt meim vnd mitt der edeln herren hern V/elreichs von Walsse hauptman in Steyr, mitt hern Fridreichs von Walsse seins brueder, mitt hern Ha^ertneids von Pettow vnd mit hern Fridreichs von dem Graben anhangunden jnsigeln versigelten. Der prieff ist geben nach Christes gepu^erd dreuzehen hundert jar, darnach in dem drev vnd fu^emfczigistem jar an sand Thomas tag des heiligen zwelf poten.

Source Fulltext: OÖUB 7 (Wien 1876), S. 341f., Nr. 334