ICH Chol von Seldenhouen vnd ich Elspet sein hausvraw vnd alle vnser erben verichen vnd tuen chvnt mit disem prief allen den, die in ansehent oder horent lesen, daz wir vnserm lieben frevnt dem erberm herren hern Eberharten von Walsse hauptman ob der Ens vnd allen sein erben mit wolbedachtem muet vnd nach vnser pesten frevnt rat cze der czeit, do wir ez wol getuen mochten, aindlefthalb phunt geltz rechter herren gu^elt, die in der Rogatsch bey Scheibs gelegen sind, daz vnser rechtz aygen ist, chaufleich vnd rechtleich an alle ansprach besuecht vnd vnbesuecht, swi so daz genant oder gehaizzen oder wo ez gelegen ist, ie ain phunt herren gelt vm sechczehen phunt alter wyenner phenning vm hundert phunt vnd vm an zway sibenczich phunt alter wyenner phenning cze chauffen haben geben, der wir scho^en vnd gar frevntleich bericht vnd gewert sein, vnd schullen auch der selben guet swi die genant sind, ir gewer sein fu^er allev ansprach, swo in des durft oder no^et geschiecht, nach landes recht cze Osterreich an alles geuerd. Wer auch, daz wir mer geltz an der selben stat gehaben mo^echten, dann vor geschriben ist, daz sol er vns herczu^e richten; wer sein aber minner, daz sol vns ab dem gelt ab gen cze geleiher weiz, als vor beschriben stet. Vnd dar vber cze ainem vrchund der vor geschriben sach geben wir in disen prieff mit vnsern insigeln vnd cze czeug mit herren Reimprechts von Scho^ennberch vnd herren Weicharts des Winchler anharrenden (sic) insigeln versigelt. Der prieff ist geben, do man czalt von Christes gepu^erd drevczehen hundert iar, darnach in dem drew vnd funfczgisten iar an sand Nyclas tag vor weinnachten.

Source Fulltext: OÖUB 7 (Wien 1876), S. 336f., Nr. 329