Ich Hainreich von Deuptal vnd ich Offmey sein hausurowe, wir vergehen vnd tu^en chunt allen den, die disen brief lesent oder ho^erent lesen, die nu lebent oder hernach chu^enftich sint, daz wir mit vnser erben gu^eten willen vnd gunst mit verdachtem mu^et vnd mit gesampter hant zu^e der zeit do wir es wol getu^en mochten, vnd mit Merten hant Hemmen aydem zu^e den zeiten richter ze Stadlawe, verchauft haben vnsern hof gelegen da selbens ze Stadlawe ze naehst dem egenanten Merten dem richter, vnd acht vnd vierczich jeuchart akchers die dar zu^e geho^erent, vnd swaz darzu^e geho^eret ze uelde vnd ze dorf, es sei gestift oder vngestift, versucht oder vnuersu^echt, swie so daz genant ist, der purchrecht ist von dem edeln hohgeborn fu^ersten herczog Albrechten ze O^esterreich, ze Steyr vnd ze Chaernden, dem man alle iar von dem selben vnserm hof dient drey helbling ze purchrecht vnd hern Dietreichen dem Fluschart zu^e den zeiten purgermaister ze Wienne achczehen wienner phenning ze v^eberzins vnd nicht mer. Den vorgenanten hof vnd swaz dar zu^e geho^eret, als vor verschriben ist, haben wir recht vnd redleich verchauft vnd geben mit allen dem nucz vnd recht als wir es alles in purchrechts gewer her pracht haben, vmb acht vnd dreizzich phunt wienner phenning, der wir gar vnd gaenczleich gewert sein, dem erbern herren hern Stephan von Hohenberch vnd seinen erben fu^erbaz ledichleich vnd vreileich ze haben vnd allen iren frumen da mit ze schaffen verchauffen verseczen vnd geben, swem si wellen an allen irresal. Vnd sein auch wir ich Hainreich von Deuptal vnd ich Offmey sein hausuro/^we vnd vnser erben vnuerschaidenleich des vorgenanten hofs vnd swaz dar zu^e gehoret als vor verschriben ist, des egenanten erbern herren hern Stephans von Hohenberch vnd seiner erben recht gewern vnd scherm fu^er alle ansprach, als purchrechts recht ist vnd des landes recht ze O^esterreich. Waer aber, daz si fu^erbaz mit recht an dem vorgenanten hof vnd alle dev vnd dar zu^e geho^eret als vor verschriben ist, icht chrieges oder ansprach gewunnen, swaz si des schaden nement, daz suln wir in alles aus richten vnd wider chern an allen irn schaden, vnd su^eln auch si daz haben auf vns vnd auf allem vnserm gu^et daz wir haben in dem lande ze O^esterreich, wir sein lebentich oder tode. Vnd daz diser chauf fu^erbaz also staet vnd vnzerbrochen beleibe, darv^eber so geben wir in disen brief ze einem warn vrchu^ende diser sache versigilt mit vnserm jnsigil vnd mit des egenanten Merten jnsigil des richters von Stadlawe, der diser sache gezeug ist mit seinem jnsigil. Diser prief ist geben ze Wienne nach Christes gepurd dreutzechen hundert iar, dar nach in dem vier vnd fumfczgistem iar an sand Gregorien tag.

Source Fulltext: OÖUB 7 (Wien 1876), S. 355f., Nr. 346