Ich Hainreich Nuntbech vergich offenlichen mit dem prief vnd tuen chunt allen den die in sehent oder horent lesen die nu lebent vnd hernach chunftig werdent, daz ich mit wol verdachtem muet vnd mit aller meiner erben guetlichen willen ze der zeit da jch daz wol getuen macht, recht vnd redlichen gemacht vnd geben han meiner hausvrowen vrown Elspeten den hof datz sand Gorigen pey der chirichen auf dem Ybsveld, der mein rechtz puerchrecht ist von dem gotzhaus dacz sand Gorigen ze rechtem heiratguet nach lansrecht fuer hundert pfunt pfenning wienner munizze also weschaidenlichen, daz si allen iren frum da mit schaffen schol ze iren tegen nach lansrecht; wer auer daz, daz di vorgenant vrowe Elspeth mein hausvrowe abging an erben, so schol der vorgenant hof her wider erben auf mich vnd auf alle mein erben. Wer auer daz daz jch vorgenanter Heinreich der Nuntbech verfuer an erben de jch vnd si mit einander hieten oder gebunnen, so schol si vnd mag allen iren frum mit dem hof schaffen ze iren tegen mit verseczen oder mit verchauffen nach lansrecht, si hab erben pey mier oder nicht, so schol si den hof haben in nucz vnd in gwer vnd schullen sey di erben die jch an sey han ez sein svn oder tochter nindert irren an dem hof vnczt an iren tod. Vnd schol ich egenanter Heinreich der Nuntbech des hofs ir rechter gwer sein fuer alle ansprach als puerchrechz recht ist vnd des lans ze Osterreich. Daz ir die red also stet vnd vnverchert weleibe, darvber gib ich ir disen prief ze einer offen v^erchund der worhait versigelt mit meinem anhangvnden insigel. Vnd sint auch des zeug her Heinreich der Gaubitz vnd mein prueder Speth von sand Lienhart mit iren anhangvnden insigeln. Der prief ist geben da man zalt von Christes gepuerd dreyzehen hundert jar, dar nach in dem vier vnd fumfczkisten jar des suntags ze mittervasten.

Source Fulltext: OÖUB 7 (Wien 1876), S. 357f., Nr. 347