Ich V/elreich der Gutiar ze der zeit phleger vnd spitalmaister ze Gmunden vnd alle die, di nach mier phleger sind vnd werdent, vergehen vnd tu^en chunt allen den, di disen brief sehent oder ho^erent lesen, daz wier iaerleich geben vnd rayhen schullen dez nachsten suntagez nach sand Merteins tag von den rechten vnd nu^eczen besu^echt vnd vnbesu^echt, dew der erber ritter her Herbort der Mulwanger gegeben vnd geschaft hat den êdurftigen in daz spital ze Gmunden auf der mu^el, dew gelegen ist in dem pu^erkchfrid ze Gmunden an der Achleiten ze nachst dem spital, wer pharrer ze Mu^enster ist oder seinem vicarij drev schilling wienner phenning vnd den herrn den gesellen da selber zwen vnd dreijzzig phenning mit so^elher beschaydenhayt, daz man dem vorgenanten hern Herborten vnd alln seinen vodern sellen vnd auch allen seinen nachcho^emen selln ein gesugnew (sic) vigily sol haben dez nachsten suntages nach sand Merteins tag vnd dor nach an dem nachsten mo^entag ein gesungnes selampt vnd zwo gesprochen selmezz. Waer aber daz getan, daz daz selgeraet allso nicht volfurt wurde gesungen vnd gesprochen alls vor geschriben stet, vnd daz sein auch ein spitalmayster nicht beweyset wu^erde mit einer rechten worhait oder di erbern purger ze Gmunden dez selben iares, so sol daz vorgenant halb phunt vnd zwen phenning veruallen sein den êdurftigen in daz spital ze Gmunden an allen chrieg vnd an all widerred vor geistleichem vnd vor weltleichem gericht. Vber daz wer daz getan, daz man von dem vorgenanten spital dem pharrer von Munster oder seinem vicari noch den gesellen dez vorgenanten halben phuntz vnd der zwayer phenning nicht gaeben dez nachsten suntagez nach sand Merteinstag alls vor geschriben ist, dez selbes iares schullen alle div nu^etz vnd besuechung di von der mu^el becho^emen dem spital mu^egen, veruallen sein dem pharrer ze Mu^enster oder seinem vicary an allen chrieg vnd an all widerred. Daz den erbern herrn pharrern vnd vicary ze Mu^enster wie di genant sind, disew sach vnd di vorgenant wandlung also sta^et vnd vntzeprochen beleib, dorv^eber gib ich obgenanter Vlreich der Gutiar vnd all di nach mier chu^enftig sint vnd werdent phleger dez spitals ze Gmunden, disen brief ze einem v^erchund der worhayt geuestent vnd bestaetigt mit meinem anhangunden jnsigel versigelt, vnd zu einer pezzern sicherhayt mit der erbern gemain stat ze Gmunden anhangunden jnsigel. Der brief ist geben nach Christi gepu^erd v^eber drewtzehen hundert jar, darnach in dem vier vnd ffu^emftzigisten jar an sand Margreten tag.

Source Fulltext: OÖUB 7 (Wien 1876), S. 370f., Nr. 360