Ich Herwort der Mu^elwanger vergich vnd tu^en chunt allen den, die disen brief sehent ho^erent oder lesent, daz ich mit wolbedahtem mu^et zter zeit, do ich ez wol getu^en mo^eht vnd mit gu^etem willen vnd wo^ert aller meiner erben han geschaffet vnd gegeben in daz spital ze Gmu^enden ze ainem ewigen selgeret mier vnd allen meinen vadern sêlen vnd auh allen meinen nahcho/^mmen sêlen ze hilffe vnd ze tro^est in der eren der heyligen driualtichait allev meinev reht vnd auh dev nu^ecze, dev ich han besucht vnd vnbesucht auf der mu^el ze Gmu^enden, dev gelegen ist in der stat pu^erchfrid an der Achleiten ze nehst bey dem spital vnd dev mein rehtes pu^erchreht ist von der edeln ho^echgeborn herschaft von O^esterreich, vnd da ich jêrchleich von gedient vnd geraihet han in daz statgericht ze Gmu^enden an sand Gorigen tag zwelf phenning wienner mu^enzze. Ich offen auh, daz ich an der vorgenanten mu^el han gehabt ain rad lediges vnd vreyes mit allen nu^eczen vnd auz dem andern rad daz sêchstail mit allen nu^eczen, so schaffe ich obgenanter Herwort der Mulwanger, daz man jêrchleich dez sûntags nah sand Merten tag von den vorgeschriben nu^eczen geben vnd raihen schol, wer spitalmaister zter selben zeit ist, dem pharrer ze Mu^enster oder wer verweser da selben ist, drei Schilling dem pharrer vnd zwen vnd dreizzig phenning seinen gesellen, da man vnsern jartag von begen schol dez selben sûntags an dem abent mit der vigili vnd an dem mentag mo^ergen dar nah mit ainem gesungen sêlampt vnd mit zwain gesprochen messen also mit so^elher beschaidenhait, wer daz getan, daz mier vnd vnsern vadern sêlen daz vorgenant sêlgeret verczogen wu^e rde, daz man an dem vorgeschriben jartag niht sunge noh niht sprech messe vnd auh mit der vigili, so schol daz vorgenant selgeret daz halbe phunt vnd zwen phenning veruallen sein dez selben jares in daz spital ze Gmu^enden den du^erftigen. Daz dem vorgenanten spital ze Gmu^enden disev sache vnd gescheft vnd dev vorbenant wandlung also stet vnd vnczebrochen beleib, dar vber so gib ich der vorgeschriben Herwaert disen brief ze ainem v^erchunde der warhait geuestent vnd bestetiget mit meinem anhangundem insigel versigelt, vnd ze ainer bêzzern sicherhait mit der erbern gemain stat jnsigel ze Gmu^enden, dev ich vleizzichleichen dar vmb gebeten han in an allen schaden. Der brief ist geben nah Christes geburde dreuzehenhundert jar, darnah in dem vier vnd ffu^emfczigisten jar an sand Margreten tag.

Source Fulltext: OÖUB 7 (Wien 1876), S. 369f., Nr. 359