Ich Jans von Trawn vergich offenleich mit disem brief allen den, di in sehent oder hoerent lesen, daz ich mit gutem willen vnd mit wolbedachtem muet vnd zder zeit do ich iz wol getuen mocht, alle meinev chind vnd mein vest ze Eschelberch vnd all mein hab, wo ich di han, empfolhen han meinem gnedigen herren bischof Gotfrid ze Pazzow, dem ich sunderlich dar zu getraw, fur all mein freunt also beschaidenleich, ob daz waer, daz ich herwider nicht chaem, des Got nicht geb, so sol er di selben meinev chind vest vnd all mein hab leut vad guet innehaben vnd verwesen so lang, vncz daz di selben meinev chind dar zu werden, daz si di vorgenanten vest vnd ander mein hab leut vnd guet selb verwesen vnd inne gehaben muegen. Auch wil ich daz, ob ich nicht herwider chäm als vor beruert ist, daz man meiner hausfrown Dorothee in der vorgenanten vest ze Eschelberch einen erleichen gemach auz zaig, da si inne wonen vnd gesein mueg all di weil, vnd si nicht einen andern man nimet. Wann aber daz waer, daz si einen andern man naem, so schol si fuerbaz mit der selben vest nichtes nicht ze schaffen haben. Vnd daz daz also staet vnd vnczebrochen beleib, dar vmb gib ich disen brif versigelten mit meinem anhangendem insigel, vnd zu einer||
pezzörn sicherhait vnd zeugnuezz hab ich gepeten di erbern herren herrn Chunrad von Tannberch vnd herrn Chunrad von Puchperch, daz di ir insigel auch dar an gehangen habent, in selbs an allen schaden. Der brief ist geben ze Pazzow in commemoratione sancti||
Pauli apostoli, anno dominj M°. ccc. liiij°.

Source Fulltext: OÖUB 7 (Wien 1876), S. 367f., Nr. 357