Ich Gedraut, hern Offen tochter von Arberch, dem Got genade, vnd Hansen hausurowe von Winden, vergich vnd tu^en chunt allen den di disen brief lesent oder ho^erent lesen, die nv lebent vnd hernach chu^enftich sint, daz ich mit gu^etem willen vnd gunst des edeln hochgeborn fu^ersten hertzoge Albrechtes ze O^esterreich ze Steyr vnd ze Chernden recht vnd redleich gemacht vnd gegeben han dem vorgenanten meinem wirt Hansen von Winden meins rechten lehens daz ich von dem selben hochgeborn fu^ersten ze lehen han, mein drittail an dem haus ze Pu^etend vnd alles daz, daz zu^e dem selben meinem drittail geho^eret in vrbar ze holtz ze velde vnd ze dorf es sei gestift oder vngestift versu^echt oder vnuersu^echt, swie so daz genant ist vnd han im dar zu^e gemacht vnd gegeben alles daz gu^et, daz ich han in der Wieltsch daz rechtes aygen ist, daz mir mein erer wirt her Erasem von Pernekke dem Got genade, ledichleichen gegeben hat, als die brief sagent, die er mir dar v^eber gegeben hat, vnd swaz ich saetze da han, es sei gestift oder vngestift versu^echt oder vnuersu^echt swie so daz genant ist, also mit ausgenomener rede, ist daz ich mit dem egenanten meinem wirt Hansen von Winden chinde gewinne, da sol denne daz vorgenant gu^et alles nach vnser paider tode auferben vnd geuallen. Waer aber, daz ich Gedraut sturbe vnd daz ich mit dem selben meinem wirt Hansen von Winden nicht chind hiet, so sol er denne mit demselben gu^et allem als es vor an diesem brief benannt ist, ledichleichen vnd vreyleichen allen seinen frumen schaffen verchauffen versetzen vnd geben swem er welle an allen irresal. Waer aber, daz ich den selben meinen wirt v^eberlebet vnd daz er mir nicht chinde liezze die ich mit ihm hiet, so sol denne daz oftgenant gu^et alles ledichleichen wider mein sein, daz ich denne da mit sol auch allen meinen frumen schaffen in alle dem recht als daz selbe gu^et vor mein gewesen ist. Vnd daz disev sache fu^erbaz also staet vnd vnzerbrochen beleibe, dar v^eber so gib ich vorgenantev Gedraut dem egenanten meinem wirt Hansen von Winden disen brief zu einem warn vrchu^ende diser sache versigelt mit meinem insigil vnd mit des edeln herren insigil graf Purcharts purgraf ze Maydburch vnd graf ze Hardekke, vnd mit des erbern herren insigil hern Eberharts von Walsse hauptman ze Drosendorf, di diser sache gezeuge sint mit irn insigiln. Diser brief ist geben ze Wienne nach Christes geburt dreutzehen hundert iar, dar nach in dem vier vnd fu^emftzgisten iar des naechsten maentages vor sant Veits tage.

Source Fulltext: OÖUB 7 (Wien 1876), S. 365f., Nr. 355