Ich V/elreich von Pergauwe hern Perichtolts sun von Pergawe vnd mein erben wier vergehen vnd thu^en chunt allen den, die disen brief lesent oder ho^erent lesen, daz wier v^ens des mit v^ensern trewen verlu^ebt vnd verpunden haben gegen meinem sweher hern Stephan von Ho^echenberch vnd gegen seinen erben vmb die zwai drittail alles des gu^etes, daz er hat ze Nidern Hautzental ze velde vnd ze do^erf ez sey gericht ez sey gestift oder vngestift versu^echt oder vnuersu^echt, swie so daz genant ist, daz er mier alles geleich zway drittail gesaczt hat fu^er drew hundert phunt wienner phenninge an meiner haymsteur, die er mier gelobt hat ze geben zu^e meiner hausurown vron Agnesen seiner to^echter nach des landes recht ze O^esterreich, an swaz er manschaft, verlehents gu^etes da hat, daz hat er im vnd seinen erben besunderleichen vo^er ausgenomen also, swenne daz ist, daz er oder sein erben die vo^ergenanten zwen drittail, die er mier fu^er die drew hundert phunt wienner phenninge gesaczt hat, zv^e seinen swaegern den Potendo^erfaern in geleichen erbtail werffen wellen, daz ich oder mein erben in des wol gu^ennen su^eln vnd si auch mit chainerlay sachen dar an nicht ieren su^eln vnd auch also mit ausgenomener rede, daz si vns denne der egenanten dreyer hundert phunt wienner phenninge von ierm erbtail gu^etes, der in denne an rechter taylung geuellet, richten vnd wern su^eln paydenthalben nach v^enser vreunt rat an alle widerred vnd an alles geuaer, als haymsteur recht ist vnd des landes recht ze O^esterreich. Vnd daru^eber so gib ich in disen brief zu^e einem warn vrchu^ende diser sache versigilt mit meinem jnsigil vnd mit des vo^ergenanten meins vater jnsigil hern Perichtolts von Pergauwe, der diser sache gezeuge ist mit seinem jnsigil. Diser brief ist geben ze Wienne nach Christes gebu/rrt drewczehen hundert iar, darnach in dem vier vnd fu^emfczgisten iar an sand Elzbeten tage.

Source Fulltext: OÖUB 7 (Wien 1876), S. 384f., Nr. 373