ICH Marchart von Tiernstain vnd ich Agnes sein hausfrawe vnd all vnser erben verichen offenbar mit disem brief allen den, di in sehent lesent oder ho^ernt lesen, daz wier recht vnd redlich mit gesampter hant nach vnser vreunt rat zeter zeit do wier ez wol tu^en möchten, ze chauffen haben geben dem erbern herren hern Reimprechten von Walse von Ens vnd allen seinen erben vnsers gu^etes zwaintzich phunt geltes vnd sechs schilling geltes, die gelegen sind in Lengenpecher gericht auf bestiften gu^etern vnd auf perchrecht vnd auf purchrecht, daz vnser rechtez aygen ist vnd des auch auf andern guetern in demselben gericht gelegen sind, an zehen metzen vyer mutt habern mariehfueter, daz vnser lehen ist von vnserm herren dem herczogen ze Osterrich, vnd haben im daz aufgeben vnd gemacht alz wier ez gehabt haben, daz vorgenant guet vnd allez daz dar zü gehört ze holcz ze ueld ze dörf versuecht vnd vnuersuecht, swie so daz genant ist, ez sei aygen purchrecht oder lehen, als wir ez vnd vnser gerben in nütz vnd gewer her pracht haben, hab wier ze chauffen geben dem vo^ergenanten hern Reinprecht von Walse vnd seinen erben vmb dreu hundert vnd zwelif phunt phenning winner münizz, der wir gancz vnd gar verricht vnd gewert sein, daz si allen irn frumen da mit schaffen süllen, versetzen verchauffen oder geben wem seu wellen, vnd setzen auch vns des scherm vnd gewêr fur all ansprach, als aigens purchrechts vnd lehens recht ist in dem land ze Osterrich. waer aber, daz dem obgenanten hern Reimprechten von Walse vnd seinen erben mit recht icht ansprach oder chrieg dar auf erstuend, den sülln wir in gêntzliech auzrichten an allen iern schaden vnd sülln si daz haben auf vns vnd auf aller der hab, di wier haben in dem land ze Osterrich oder swo wir ez haben, wier sein lebentig oder tode. Vnd dar vber ze v^erchund gib ich vorgenanter Marchart von Tiernstain dem egenanten hern Reinprechten von Walse von Ens vnd seinen erben disen brief versigelt mit meinem anhangundem jnsigel vnd mit meins prveder Reimprechten von Tiernstain jnsigel vnd mit hern Marcharts vnd Wulfings der Hausler jnsigel, die diser sach geczeug sind mit iern jnsigeln. Geben ze Chrems an sand Lucas tag von Christi gepu^erde dreuzehen hundert jar in dem vier vnd fumftzkistem jar.

Source Fulltext: OÖUB 7 (Wien 1876), S. 378f., Nr. 367