ICH Wernhart der Graffenwerder vergich vnd tu^en chvnt allen den, die disen brief lesent oder hoernt lesen, di nv lebent vnd hernach chvnftich sint, daz mir mein lieber swecher Wernher der Harrocher zv den zeiten purgraff dacz Partenstain, dem Got gnade, geben hat ze meiner hausurown vron Angnesen seiner tochter vierczich phunt alter wienner phenning zv rechtem heyrat guet, die ich mir ze nvcz vnd ze frume an gelegt han, nv han ich meinen lieben swaegern hern Vlreichen vnd Benischen vnd irn geswisdreiden auzzaigt vnd auch geweist han (sic) vmb die egenanten vierczich phunt phenning die gueter, di hernach geschriben stent: die zwai guet auf der Revt vnd ains dacz dem Hvnger vnd ains dacz Stainsulcz, die mir stent von meinem herren von Schawnberch vier vnd zwainczich phunt wienner phennig, vnd han auch aindlef schilling geltes purchrechcz dacz Ascha, da (sic) Karlinn von mir hat, vnd auf einer wis auf dem Mozz vnd auf akchern ze Tvnenhaim vnd datz Ascha auf gaerten, vnd von dem vorgeschriben purchrecht dien wir purchrecht hincz Hartchyrchen dem pharrer, vnd daz mir auch mit des pharrer hant bestaett ist vnd die Karlinn dem pharrer geben sol daz purchrecht waz in da ze recht an gehorrt, vnd mir daz meinn, vnd ein phunt geltes da selbs, daz mir der Hawnczichel dient, vnd dacz Chadling drey schilling geltes auf dem obern lehen; vnd die vorgenanten gueter sol ich vnuerchumert inne haben vncz an meinen tode. Ob daz ist, daz man die vorgenanten gueter von mir loest, so sol ich die selben phennig mit einer gewissen vnd nach vnser bayder vreunt rat legen hincz einem erbern mann alz lang, vncz daz man vmb die selben phennig wider chauf vnd anlege an andrew gueter. Vnd sol auch ich die selben gueter inne haben in allem dem rechten, alz vor geschrieben stet. Ich pin auch der vorgenanten gueter mit recht ir gewer fur alle ansprach. Nv vergich ich Ott vnd ich Joerge di Greiffenstainer, daz vnser lieber oechaym her Wernhart der Graffenwerder daz vorgeschriben gemaecht mit vnserm guetleichem willen gemacht vnd bestaêtt hat so beschaidenleich, ob vnser vorgenanter oechaym ab gienge vnd sturbe, des im Got lan (sic) vor sey, so suln si die vorgenanten gueter alz lang inne haben, vncz wir sev von in loesen vmb die vorgenanten vierczich phunt phennig, so suln si vns wider ze loesen geben an allen chrieg vnd an allen irrsal, swelichs iars wir mvgen oder wellen acht tage vor sand Joergen tage oder acht tage hin nach. Si suln vns auch die vorgenanten losung nicht vercziechen. Waer aver, daz man von im loest vnd er die phennig nicht an legt, so sol man iz haben auf aller seiner habe, wo er sey habe. Vnd daz furbaz dise sache also stät vnd vnczebrochen beleib, dar vmb so geben wir in disen brief zv einem warn vrchunde dier sache versigilten ich vorgenanter Wernhart der Graffenwerder mit meinem anhangunden insigel vnd ich vorgenanter Ott vnd ich Joerge di Greiffenstainer mit vnsern anhangunden insigiln. Diser brief ist geben nach Christes gepurde dreuczechen hundert iar, dar nach in dem fu^emf vnd funfczgisten iar des erichtachs nach dem swarczen svntage in der vasten.

Source Fulltext: OÖUB 7 (Wien 1876), S. 407f., Nr. 395