Wir graf Vlreich von Schownberch verichen offenlich vnd tun kund mit disem brief, daz wir vns gen dem ho^echgeborn fu^ersten unserm gnedigen herren herczoq Albrecht von O^esterreich verpunden haben, daz wir im vnd seinen erben wartent vnd geho^ersam sullen sein mit allen vnsern vesten, die wier haben in seinen landen, sev vnd die iern dar in vnd dar auz ze lazzen ze allen iern notdu^erften an vnsern merchlichen schaden. Vnd sullen ouch wir in da mit getrewlich geholfen sein. So sullen vns der vorgenant vnser herr herczog Albrecht vnd sein erben gnedichlich vertreten, versprechen vnd geholfen sein, vves wir recht haben als andern seinen dienern, wo vns des no^et beschiecht. Des geben wir zu vrchund disen brief besigelten mit vnserm insigel. Geben ze Wienn an samcztag vor dem sunntag oculi. Nach Christes gebu^erd dreutzehen hundert jar, darnach in dem fumf vnd fumfczkisten jar.

Source Fulltext: OÖUB 7 (Wien 1876), S. 406f., Nr. 394