Ich Reinhart Wyelli vnd mein havsfrow Katrei vnd all vnser erben di wir haben oder noch gewinnen, wir veriehen offenbar mit dem prief vnd tunn chvnt allen den, die den prief sehent lesent oder lesen horent di nv lebent oder noch chvmftig sint, daz wir mit wolbedachtem mvet vnd mit rat vnd gvnst vnd guetem willen aller vnser erben vnd vrevnt recht vnd redleich zder zeyt do wier ez wol getun mochten, dem erbern mann Wulfing purger in der Vreinstat vnd seiner havsfrovn Elspeten vnd ir payder erben verchaufft haben vnsern zehent, den wir gehabt haben in dem Purchveld zder Vreinstat, mit allen den nvczen vnd rechten, vnd wir in gehabt haben von vnserm genaedigen herren pyschof Gotfriden ze Pazzaw vmb zwai hyndert phunt phenning wienner mvnzz, der si vns gancz vnd gar gericht vnd gewert haben. Wir veriehen auch vnd schullen dez selben vorbenanten zehents ir gewer sein vor recht vnd auch an aller stat, wo in dez not geschiecht, als landez recht ist. Naemen si aber daran dhainen schaden, den schullen wir in ablegen vnd widercheren gancz vnd gar, swo wir in dez abgiengen, waz si dez schaden naemen, den schullen si haben auf vns vnd auf vnsern erben vnd auf aller vnser hab di wir haben, besuecht vnd vnbesuecht, vnd schullen si auch dez selben schaden von vns bechomen, wi si nachst mvgen mit vnserm guetleichem willen also, daz wir sev dar an mit nichtev schullen irren noch engen. Wer aber daz, daz iemant meiner oder meiner havsfrown erben stellen oder seczen wolten nach dem vorbenanten zehent mit recht oder mit ansprach, di selben geben dem vorgenanten Wulfing oder sein erben zwai hvndert phunt phenning vnd haben sich zu dem vorbenanten zehent. Daz di wandlung vnd der chauff als vor beschriben stet vnuerchert vnd staet beleib, daruber gib ich vorgenanter Reinhart der Wyelli den offen prief fur mich vnd fur all mein erben wolbesigelt vnd bestaet mit meinem anhangunden insigel, vnd zv einem zevg vnd auch durich pezzer sicherhait der vorbenanten wandlung ist der prief vnd auch der chauff beuestent vnd bestaett mit hern Chvnrats insigel dez Schevrbechen zden zeyten lantrichter in der Vreinstat vnd mit Hainreichs insigel dez Lozperger vnd mit Chraften insigel von Harach wolbesigelten vnd bestaet in an allen schaden fur allen chvnftigen chrieg. Der prief ist geben nach Christes gepurd drevzehenhvndert jar, dar nach in dem fvmph vnd fvmpfczkistem jar des montags vor sand Margreten tag.

Source Fulltext: OÖUB 7 (Wien 1876), S. 418f., Nr. 407